ഉമ്മഹാത് ദ്വീപിലെ വാട്ടർ എയർപോർട്ടിന് പ്രവർത്തന ലൈസൻസ് ലഭിച്ചതായി റെഡ് സീ ഇന്റർനാഷനൽ അറിയിച്ചു. വ്യോമഗതാഗത സുരക്ഷയ്ക്കുള്ള സിവിൽ ഏവിയേഷന്റെ എല്ലാ ആവശ്യകതകളും പൂർത്തിയാക്കിയതിനു ശേഷമാണ് ലൈസൻസ് ലഭിച്ചത്. സൗദിയിലെ ജല വിമാനത്താവളത്തിനുള്ള ആദ്യ ലൈസൻസ് കൂടിയാണിത്. രാജ്യത്തെ ആഡംബര ടൂറിസം മേഖലയെ ശക്തിപ്പെടുത്തുന്നതിനാണ് ജല വിമാനത്താവളത്തിലൂടെ ലക്ഷ്യമിടുന്നത്.
അതേസമയം സൗദിയിലെ ആദ്യത്തെ സീപ്ലെയിൻ ഓപറേറ്ററായ ഫ്ലൈഡ് സീ, സിവിൽ ഏവിയേഷനിൽനിന്ന് ‘എയർ ഓപറേറ്റർ’ സർട്ടിഫിക്കറ്റും സുരക്ഷ ഓപറേറ്റിങ് സേവനങ്ങൾ നൽകാനുള്ള ലൈസൻസും സ്വന്തമാക്കിയിട്ടുണ്ട്. വ്യോമയാനവും ജലസൗന്ദര്യവും തമ്മിലുള്ള സവിശേഷമായ യോജിപ്പ് പ്രദർശിപ്പിക്കുന്നതാണ് എയർപോർട്ട്.
റെഡ് സീ ഇന്റർനാഷണലിന് ആദ്യത്തെ വാട്ടർ എയർപോർട്ട് ലൈസൻസ് വിതരണം ചെയ്യുന്നത് നിക്ഷേപത്തിന് ആകർഷകമായ അന്തരീക്ഷം സൃഷ്ടിക്കുന്നതിന് എല്ലാ പിന്തുണയും നൽകാനുള്ള അതോറിറ്റിയുടെ അശ്രാന്ത പരിശ്രമത്തിന്റെ ഭാഗമാണെന്ന് സിവിൽ ഏവിയേഷൻ അതോറിറ്റി ചെയർമാൻ അബ്ദുൽ അസീസ് ബിൻ അബ്ദുല്ല അൽ ദുവൈലെജ് പറഞ്ഞു. കൂടാതെ വ്യോമയാന മേഖലയിൽ ഉയർന്ന നിലവാരത്തിലുള്ള സുരക്ഷയും ഗുണനിലവാരവും ഉറപ്പാക്കുന്നത് തുടരാനുള്ള അതോറിറ്റിയുടെ ശ്രമങ്ങൾക്കൊപ്പം ചെങ്കടൽ ലക്ഷ്യസ്ഥാന പദ്ധതികൾ ഉൾപ്പെടെ ‘വിഷൻ 2030’ പദ്ധതികളുടെ ആവശ്യങ്ങൾ നിറവേറ്റാൻ ശ്രമിക്കുന്നതായും അൽ ദുവൈലജ് കൂട്ടിച്ചേർത്തു.
