യുഎഇയിൽ കനത്ത മൂടൽമഞ്ഞിനെ തുടർന്ന് റെഡ് അലർട്ട് പ്രഖ്യാപിച്ചു. ദുബായ്ക്കും അബുദാബിക്കും ഇടയിലുള്ള പ്രദേശങ്ങളിലാണ് ശക്തമായ മൂടൽമഞ്ഞിന്റെ പശ്ചാത്തലത്തിൽ നാഷണൽ സെന്റർ ഓഫ് മെറ്റീരിയോളജി (എൻസിഎം) റെഡ് അലർട്ട് പ്രഖ്യാപിച്ചത്.
മൂടൽമഞ്ഞിനേത്തുടർന്ന് ഇന്ന് രാവിലെ വാഹനമോടിക്കുന്നവർ അതീവ ജാഗ്രത പാലിക്കണമെന്നും അധികൃതർ നിർദ്ദേശിച്ചു.
ഇന്ന് അബുദാബിയിലും ദുബായിലും 85 മുതൽ 80 ശതമാനം വരെ ഈർപ്പം ഉള്ളതിനാൽ ഭാഗികമായി മേഘാവൃതമായ കാലാവസ്ഥയായിരിക്കുമെന്നാണ് വിലയിരുത്തൽ. ദുബായിലെ അൽ മക്തൂം ഇന്റർനാഷണൽ എയർപോർട്ടിലും അബുദാബിയിലെ അൽ ഫയ റോഡിലും പുലർച്ചെ അഞ്ച് മണി കഴിഞ്ഞപ്പോൾ മൂടൽമഞ്ഞ് രൂക്ഷമാകാൻ തുടങ്ങിയിരുന്നു. പ്രത്യേകിച്ച് രാജ്യത്തിന്റെ വടക്ക് കിഴക്കൻ പ്രദേശങ്ങളിൽ എൻസിഎം വിലയിരുത്തൽ പ്രകാരം ഇന്ന് മുഴുവൻ താപനിലയിൽ വർദ്ധനവുണ്ടാകും. ഇന്ന് അബുദാബിയിൽ താപനില 41 ഡിഗ്രി സെൽഷ്യസും ദുബായിൽ 40 ഡിഗ്രി സെൽഷ്യസും എത്തും. എമിറേറ്റുകളിൽ യഥാക്രമം 31 ഡിഗ്രി സെൽഷ്യസും 32 ഡിഗ്രി സെൽഷ്യസും ആയിരിക്കും.
ഇന്ന് രാത്രിയിലും നാളെ രാവിലെയും ചില തീരപ്രദേശങ്ങളിലും ഉൾനാടൻ പ്രദേശങ്ങളിലും ഉയർന്ന ആർദ്രത പ്രതീക്ഷിക്കാം. കാറ്റിന്റെ വേഗത സാധാരണയായി നേരിയതോ മിതമായതോ ആയിരിക്കുമെന്നും പകൽസമയത്ത് ഇവടെ പൊടിക്കാറ്റ് നിറഞ്ഞ കാലാവസ്ഥ അനുഭവപ്പെടാൻ സാധ്യതയുണ്ടെന്നും എൻസിഎം അറിയിച്ചു. ഈ ദിവസങ്ങളിൽ അറേബ്യൻ ഗൾഫ് കടൽ താരതമ്യേന ശാന്തമായിരിക്കുമെങ്കിലും ഒമാൻ കടൽ ചില സമയങ്ങളിൽ പ്രക്ഷുബ്ധമാകുമെന്നാണ് വിലയിരുത്തുന്നത്.
