രാജീവ് ഗാന്ധി വധക്കേസ് പ്രതികളുടെ മോചനത്തിൽ പുനഃപരിശോധന ഹർജിയുമായി കേന്ദ്രസർക്കാർ. പ്രതികൾക്ക് ജയിൽ മോചനം അനുവദിച്ച സുപ്രീം കോടതിയുടെ നടപടി പുനഃപരിശോധിക്കണമെന്ന് കേന്ദ്രം അവശ്യപ്പെട്ടു.
1991ൽ തമിഴ്‌നാട്ടിലെ ശ്രീപെരുംപുത്തൂരിൽ എൽടിടിഇ നടത്തിയ ചാവേർ ആക്രമണത്തിലാണ് മുൻ പ്രധാനമന്ത്രിയായിരുന്ന രാജീവ് ഗാന്ധി കൊല്ലപ്പെട്ടത്. കേസിൽ ശിക്ഷിക്കപ്പെട്ട് 31 വർഷം ജയിലിൽ കഴിഞ്ഞ ആറു പ്രതികളെ വിട്ടയയ്ക്കാൻ കഴിഞ്ഞ ദിവസം സുപ്രീം കോടതി ഉത്തരവിട്ടു
പ്രതികളായ നളിനി, ഭർത്താവ് മുരുഗൻ (ശ്രീഹരൻ) ഉൾപ്പെടെ ആറുപേർ ജയിൽ മോചിതരായി. കേസിൽ കേന്ദ്രസർക്കാർ വാദം വിശദമായി കോടതി കേട്ടില്ലെന്നും ഹർജിയിൽ പറയുന്നു. വിട്ടയച്ച ആറുപേരിൽ 4 പേർ ശ്രീലങ്കൻ പൗരന്മാരാണ്. രാജ്യത്തിൻ്റെ മുൻ പ്രധാനമന്ത്രിയെ വധിച്ച ഭീകരവാദികളാണ് ഇവരെന്ന് കേന്ദ്രം നൽകിയ ഹർജിയിൽ പറയുന്നു.
