രാജസ്ഥാനിൽ പുതിയ മുഖ്യമന്ത്രിയെ തെരഞ്ഞെടുക്കുന്നത് വൈകിയേക്കും. എംഎൽഎമാർ രാജി ഭീഷണി മുഴക്കിയത് ഗെഹ്ലോട്ടിൻ്റെ പദ്ധതിപ്രകാരമന്നാണ് റിപ്പോർട്ടുകൾ. ഇന്നലെ വൈകിട്ട് നിയമസഭാ കക്ഷി യോഗം വിളിച്ചത് ഗെലോട്ടിനെ ചൊടിപ്പിച്ചതാണ് കാരണം. മുഖ്യമന്ത്രിയാകുമെന്ന് സച്ചിൻ പൈലറ്റ് എംഎൽഎമാർക്ക് സൂചന നൽകിയതായാണ് സൂചന.എന്നാൽ എഐസിസി അധ്യക്ഷ തെരഞ്ഞെടുപ്പിന് ശേഷം മതി മുഖ്യമന്ത്രി ചർച്ചയെന്ന ആവശ്യം അംഗീകരിക്കപ്പെടാതെ വന്നതോടെയാണ് രാജി നീക്കവുമായി എംഎൽഎമാർ രംഗത്തുവന്നത്. 92 എംഎൽഎമാരും കഴിഞ്ഞ രാത്രി സ്പീക്കർക്ക് രാജിക്കത്ത് നൽകുകയായിരുന്നു.
അതേസമയം, അശോക് ഗെഹ്ലോട്ടിനെ അധ്യക്ഷനാക്കുന്നതിനെതിരെ ഒരു വിഭാഗം നേതാക്കൾ രംഗത്ത് വന്നിരുന്നു. രാജസ്ഥാനിൽ കാര്യങ്ങൾ വഷളാക്കി ഹൈക്കമാൻഡിനെ അതൃപ്തിയിലാക്കിയ ഗെഹ്ലോട്ടിനെ പരിഗണിക്കരുതെന്നാണ് നേതാക്കളുടെ ആവശ്യം. ഹൈക്കമാൻഡ് അപമാനിക്കപ്പെട്ടെന്നാണ് ഇവരുടെ ആരോപണം.
അശോക് ഗെഹ്ലോട്ടിനേയും, സച്ചിൻ പൈലറ്റിനേയും ഹൈക്കമാൻഡ് ഡൽഹിക്ക് വിളിപ്പിച്ചിട്ടുണ്ട്. യോഗം റദ്ദാക്കിയതിന് പിന്നാലെ അശോക് ഗെഹ്ലോട്ടുമായി കെ സി വേണുഗോപാല്‍ സംസാരിച്ചിരുന്നു. കാര്യങ്ങൾ തൻ്റെ നിയന്ത്രണത്തിലല്ലെന്നാണ് അശോക് ഗെഹ്ലോട്ട് കെ സി വേണുഗോപാലിനെ അറിയിച്ചത്.ഇടഞ്ഞുനിൽക്കുന്ന എംഎല്‍എമാരോട് സംസാരിക്കാന്‍ നിരീക്ഷകര്‍ക്ക് സോണിയ ഗാന്ധി നിര്‍ദ്ദേശം നല്‍കി. തീരുമാനം ഹൈക്കമാന്‍ഡിന് വിടാനുള്ള പ്രമേയം പാസാക്കാനും നിര്‍ദ്ദേശമുണ്ട്.
അധ്യക്ഷ തെരഞ്ഞെടുപ്പിന് മുന്നോടിയായി മുഖ്യമന്ത്രി പദം അശോക് ഗെഹ്ലോട്ട് രാജി വെക്കുന്നതോടെ സച്ചിന്‍ പൈലറ്റിനെ ആ സ്ഥാനത്തേക്ക് കൊണ്ടുവരാനായിരുന്നു ഹൈക്കമാൻഡ് ശ്രമം. ഗെഹ്ലോട്ട് പക്ഷത്തുള്ള ചില എംഎല്‍എമാര്‍ സച്ചിനെ പിന്തുണക്കുമെന്ന സൂചന കിട്ടിയതോടെയാണ് നിയമസഭ കക്ഷിയോഗം വിളിക്കാന്‍ ഹൈക്കമാന്‍ഡ് തീരുമാനിക്കുകയായിരുന്നു.
92 എംഎല്‍എമാരുടെ പിന്തുണ അശോക് ഗെഹ്ലോട്ട് പകത്തിനുണ്ടെന്നാണ് അവകാശവാദം. മുഖ്യമന്ത്രി ചര്‍ച്ച ഉടനെ വേണ്ടെന്നും അധ്യക്ഷ തെരഞ്ഞെടുപ്പിന് ശേഷം ചര്‍ച്ചയാകാമെന്നുമാണ് ഗെലോട്ട് വിഭാഗത്തിൻ്റെ അഭിപ്രായം. സച്ചിന്‍ പൈലറ്റിനെ മുഖ്യമന്ത്രിയാക്കിയാല്‍ കൂട്ടരാജിയെന്ന ഭീഷണിയാണ് എംഎല്‍എമാര്‍ നടത്തിയത്. പിന്നാലെ നിയസഭാകക്ഷിയോഗം ആരംഭിക്കാന്‍ നിമിഷങ്ങള്‍ ബാക്കി നില്‍ക്കേ ഹൈക്കമാന്‍ഡ് തീരുമാനപ്രകാരം യോഗം റദ്ദാക്കുകയായിരുന്നു.
