മനുഷ്യത്വത്തിന്റെ മാതൃകയായി മാറി തുർക്കിയിലെയും സിറിയയിലെയും ഭൂകമ്പ ദുരിതബാധിതർക്ക് 10,000 കണ്ടെയ്നർ വീടുകൾ വിതരണം ചെയ്ത് ഖത്തർ. അവസാന കണ്ടെയ്നർ വീടിന്റെ വിതരണം കഴിഞ്ഞ ദിവസമാണ് ഖത്തർ പൂർത്തിയാക്കിയത്. ദുരിതബാധിതർക്ക് സുരക്ഷിതമായി താമസിക്കാനായി ഖത്തർ ഫണ്ട് ഫോർ ഡെവലപ്മെന്റ് ആണ് ഓരോ ബാച്ചുകളായി കണ്ടെയ്നർ വീടുകൾ എത്തിച്ചുനൽകിയത്.
അമീർ ഷെയ്ഖ് തമീം ബിൻ ഹമദ് അൽതാനിയുടെ നിർദേശ പ്രകാരം രക്ഷാപ്രവർത്തനങ്ങളിലും മെഡിക്കൽ – ദുരിതാശ്വാസ സഹായ വിതരണങ്ങളിലും ഖത്തർ സജീവമാണ്. ലോകകപ്പ് കാണാനെത്തിയ ആരാധകർക്ക് താമസിക്കാനായി ഒരുക്കിയ കണ്ടെയ്നർ വീടുകളാണ് തുർക്കിയിലെയും സിറിയയിലെയും ഭൂകമ്പത്തിൽ വീടുകൾ നഷ്ടപ്പെട്ടവർക്ക് നൽകിയത്. എല്ലാസൗകര്യങ്ങളും ഉൾപ്പെട്ടതാണ് കണ്ടെയ്നർ വീടുകൾ.
ഭൂകമ്പ ദുരിതബാധിതർക്കായി ഖത്തറിൽ നടത്തിയ ധനശേഖരണ ക്യാംപെയ്നിലേക്ക് 5 കോടി റിയാൽ അമീർ സംഭാവന ചെയ്തു. ഇതിനുപുറമെ 16,80,15,836 റിയാൽ ക്യാംപെയ്നിലൂടെയും ശേഖരിച്ചു. 70,000 പേർക്കായി വടക്കൻ സിറിയയിൽ ചെറുനഗരം നിർമ്മിക്കുമെന്ന് ഖത്തർ ഫണ്ട് ഫോർ ഡവലപ്മെന്റും തുർക്കി എമർജൻസി റെസ്പോൺസ് സ്ഥാപനമായ എഎഫ്എഡിയും ചേർന്ന് പ്രഖ്യാപിച്ചിട്ടുണ്ട്.
