പുരസ്കാരനേട്ടവുമായി ഖത്തർ എയർവേസ്. മിഡിൽ ഈസ്റ്റിലെ മികച്ച എയർലൈൻ ഉൾപ്പെടെ നാല് പുരസ്കാരങ്ങൾ സ്വന്തമാക്കി ഖത്തർ എയർവേസ്. മിഡിൽ ഈസ്റ്റിലെ മികച്ച എയർലൈൻ, മികച്ച ബിസിനസ് ക്ലാസ്, മികച്ച ബിസിനസ് ക്ലാസ് ലോഞ്ച്, മികച്ച ബിസിനസ് ക്ലാസ് ലോഞ്ച് ഡൈനിങ് എന്നീ പുരസ്കാരങ്ങളാണ് ഖത്തർ എയർവേസ് സ്വന്തമാക്കിയത്.
പാരിസ് എയർഷോയുടെ ഭാഗമായി നടന്ന സ്ത്രൈടാക്സ് എയർലൈൻ അവാർഡ് പ്രഖ്യാപനത്തിലാണ് ഖത്തർ എയർവേസ് നേട്ടം കൊയ്തത്. ഖത്തർ എയർവേസ് സി.ഇ.ഒ അക്ബർ അബാകിർ, ഹമദ് വിമാനത്താവളം സി.ഒ.ഒ എൻജി. ബദർ മുഹമ്മദ് അൽ മീർ എന്നിവർ പുരസ്കാരങ്ങൾ ഏറ്റുവാങ്ങി. ഇത് പത്താം പ്രാവശ്യമാണ് മികച്ച ബിസിനസ് ക്ലാസിനുള്ള പുരസ്കാരം ഖത്തർ എയർവേസിന് ലഭിക്കുന്നത്. ഖത്തർ എയർവേസിന്റെ ഹമദ് വിമാനത്താവളത്തിലെ അൽമൗർജാൻ ലോഞ്ചാണ് ലോകത്തെ ഏറ്റവും മികച്ച ബിസിനസ് ക്ലാസ് ലോഞ്ച് വിഭാഗത്തിൽ മുന്നിട്ടുനിന്നത്.
പുരസ്കാര നേട്ടം ഖത്തർ എയർവേസിന്റെ മികച്ച സേവനത്തിനും ഗുണനിലവാരത്തിനുമുള്ള അംഗീകാരമാണെന്ന് സി.ഇ.ഒ അക്ബർ അൽ ബാകിർ പ്രതികരിച്ചു. ഏറ്റവും മികച്ച ഉപഭോക്തൃ സേവനത്തിനുള്ള നേട്ടം കൂടിയാണ് ഖത്തർ എയർവേസിന് ലഭിച്ചതെന്നും അദ്ദേഹം കൂട്ടിച്ചേർത്തു.
