ഇന്ത്യൻ പ്രവാസികൾക്ക് കലാ,സാംസ്കാരിക ആഘോഷ വിരുന്നായി ഖത്തറിലെ ‘പാസേജ് ടു ഇന്ത്യ’ കമ്യൂണിറ്റി ഫെസ്റ്റിന് വ്യാഴാഴ്ച തുടക്കമാവും. നാടും നഗരവും റമദാനെ വരവേൽക്കാൻ ഒരുങ്ങുന്നതിനിടയിലാണ് ഇന്ത്യൻ എംബസിയുടെയും ഇന്ത്യൻ കൾച്ചറൽ സെന്ററിന്റെയും ആഭിമുഖ്യത്തിൽ വൈവിധ്യമാർന്ന ആഘോഷങ്ങളുമായി പാസേജ് ടു ഇന്ത്യ അരേങ്ങറുന്നത്. ഇന്ത്യ-ഖത്തർ നയതന്ത്ര സൗഹൃദത്തിന്റെ 50ാം വാർഷിക ആഘോഷം കൂടിയാണ് ഇത്തവണത്തെ ‘പാസേജ് ടു ഇന്ത്യ’. മൂന്നു ദിനങ്ങളിലായി ഖത്തറിൽ ആഘോഷങ്ങളുടെ മേളമായിരിക്കും.
ഖത്തർ മ്യൂസിയവുമായി സഹകരിച്ച് നടത്തുന്ന പരിപാടിയുടെ വേദി മ്യൂസിയം ഓഫ് ഇസ്‍ലാമിക് ആർട്ട് (മിയ) പാർക്കാണ്. കലാ-സാംസ്കാരിക പരിപാടികൾക്ക് പുറമേ ഇന്ത്യൻ രുചിക്കൂട്ടുകളുടെ പെരുമ വിളിച്ചോതുന്ന ഭക്ഷ്യമേളയും ഇന്ത്യയുടെ സാംസ്കാരിക-ചരിത്രനേട്ടങ്ങൾ പകർത്തുന്ന പ്രദർശനങ്ങളും ഖവാലി ഉൾപ്പെടെ സംഗീത പരിപാടികളും ഉണ്ടാവും. ലൈവ് പെയിന്റിങ്, ഫോട്ടോ പ്രദർശനം എന്നിവയും വ്യാഴം, വെള്ളി, ശനി ദിവസങ്ങളിലെ ആഘോഷങ്ങളുടെ മാറ്റ് കൂട്ടും.
വ്യാഴാഴ്ച വൈകുന്നേരം നാലിന് ലൈവ് മ്യൂസിക് ഷോയോടുകൂടി പരിപാടികൾക്ക് തുടക്കം കുറിക്കും. ഏഴുമണിക്കാണ് ഔദ്യോഗിക ഉദ്ഘാടന ചടങ്ങ്. തുടർന്ന് ഇന്ത്യയുടെ ശാസ്ത്രനേട്ടങ്ങളുടെ പ്രതീകമായ ചന്ദ്രയാന്റെയും പാർലമെന്റിന്റെയും മാതൃകകൾ അംബാസഡർ വിപുൽ ഉദ്ഘാടനം ചെയ്യും. ഖത്തരി ഉന്നതർ, എംബസി അപെക്സ് ബോഡി ഭാരവാഹികൾ ഉൾപ്പെടെ പ്രമുഖർ ചടങ്ങിൽ പങ്കെടുക്കും. അന്താരാഷ്ട്ര വനിതാ ദിനമായ വെള്ളിയാഴ്ച കേരളീയ സമാജം നേതൃത്വത്തിൽ മെഗാ കേരള ഫ്യൂഷൻ അരങ്ങേറും. കേരള നടനം, തിരുവാതിരക്കളി, വിവിധ നൃത്തങ്ങൾ എന്നിവ ഉൾപ്പെടുന്ന കേരള ഫ്യൂഷൻ പരിപാടിയുടെ പ്രത്യേക ആകർഷണമാണ്. തുടർന്ന് ദീർഘകാല പ്രവാസികൾക്കുള്ള ആദരവിനും വേദി സാക്ഷ്യം വഹിക്കും.
40 വർഷത്തിലേറെ കാലം ജീവിതത്തിന്റെ നല്ല പകുതിയും ഖത്തറിൽ ജീവിച്ച പ്രവാസികൾ, 30 വർഷത്തിലേറെയായി പ്രവാസികളായ ഗാർഹിക ജീവനക്കാർ, 25 വർഷത്തിലേറെയായി വീട്ടുവേല ചെയ്യുന്ന പ്രവാസികൾ എന്നിങ്ങനെ 40 പേരെയാണ് ഇത്തവണ ഐ.സി.സി നേതൃത്വത്തിൽ ആദരിക്കുന്നത്. പരിപാടിയുടെ അവസാന ദിനമായ ശനിയായ ആഭ്യന്തര മന്ത്രാലയത്തിന്റെ ശ്വാനപ്രദർശനവും തുടർന്ന് 300ലേറെ നർത്തകർ പങ്കെടുക്കുന്ന മെഗാ ഗർബ നൃത്തവും അരങ്ങേറും. സമാപന ദിവസത്തിൽ വിവിധ മേഖലകളിലുള്ള സ്വദേശികളെയും ആദരിക്കുന്നുണ്ട്.
സാംസ്കാരിക, ഭാഷാ, കലാ വൈവിധ്യത്താൽ സമ്പന്നമായ ഇന്ത്യയെ പ്രവാസി മണ്ണിൽ വിവിധ രാജ്യക്കാർക്ക് മുന്നിൽ പരിചയപ്പെടുത്താനുള്ള അവസരമായാണ് ‘പാസേജ് ടു ഇന്ത്യ’ ഒരുങ്ങുന്നത്. വ്യാഴാഴ്ച വൈകുന്നേരം നാല് മണി മുതൽ രാത്രി 11 മണി വരെ എല്ലാ ദിവസവും നടക്കുന്ന പരിപാടികൾ ഖത്തറിന്റെ സായാഹ്നനങ്ങൾക്ക് മിഴിവേകും.
