കുവൈറ്റിൽ സ്വദേശികൾക്കുള്ള തൊഴിലവസരങ്ങൾക്ക് മുൻഗണന നൽകാനുള്ള ശ്രമങ്ങൾ തുടർന്ന് വരുകയാണ്. എന്നാൽ ഇപ്പോൾ പൗരന്മാർക്കും പ്രവാസികൾക്കും ഒരുപോലെ അപേക്ഷിക്കാൻ കഴിയുന്ന വിധത്തിലുള്ള പുതിയ ജോലികൾ അവതരിപ്പിച്ചിരിക്കുകയാണ് കുവൈറ്റ് മുനിസിപ്പാലിറ്റി. വാർഷിക ബജറ്റ് റിപ്പോർട്ട് അനുസരിച്ച് 1,090 ഒഴിവുകളാണുള്ളത്. ഇതിൽ മരണപ്പെട്ടയാളുടെ ആചാരപരമായ കഴുകൽ നടത്താൻ പ്രവാസികൾക്കായി പ്രത്യേകം നിയുക്തമാക്കിയിട്ടുള്ള ശവസംസ്കാര വകുപ്പിലെ 36 തസ്തികകളുണ്ട്. കൂടാതെ മൃതദേഹം കൊണ്ടു പോകുന്ന വാഹനങ്ങളുടെ ഡ്രൈവർ തസ്തികയിൽ 25 അവസരങ്ങളും ഉൾപ്പെടുന്നു.
അതേസമയം അക്കൗണ്ടന്‍റുമാർ, ആർക്കിടെക്‌ചർ, മെക്കാനിക്‌സ്എ, ഇലക്‌ട്രിസിറ്റി എന്നിവയിലെ എൻജിനീയർമാർക്കുള്ള അവസരങ്ങളുമുണ്ട്. എന്നാൽ നിലവിൽ ഈ സ്ഥാനങ്ങൾ വിദേശ അപേക്ഷകർക്ക് അവസരം ലഭിക്കുമോയെന്ന എന്ന കാര്യത്തിൽ വ്യക്തയില്ല. മുനിസിപ്പാലിറ്റിയുടെ ശാഖകളിൽ ഉടനീളമുള്ള അഡ്മിനിസ്ട്രേറ്റീവ് റോളുകൾ സ്വദേശി പൗരന്മാർ മാത്രമായാണ് നീക്കിവച്ചിരിക്കുന്നത്. അതേസമയം 2024 ഏപ്രിലിൽ പ്രാബല്യത്തിൽ വരുന്ന പുതിയ ബജറ്റ് വേതനത്തിനും നഷ്ടപരിഹാരത്തിനുമായി 190 ദശലക്ഷം കുവൈറ്റ് ദിനാർ വകയിരുത്തുന്നു എന്നാണ് റിപ്പോർട്ട്. ഇതിൽ നിലവിലെ ബജറ്റിനെ അപേക്ഷിച്ച് ഒൻപത് ദശലക്ഷം കുവൈറ്റ് ദിനാറിന്‍റെ വർധനവുണ്ട്.
ഏകദേശം 483,200 ആളുകൾ കുവൈറ്റിലെ പൊതുമേഖലയിൽ ജോലി ചെയ്യുന്നുണ്ട്. ഇതിൽ 23 ശതമാനവും വിദേശികളാണ്. ഗൾഫ് സഹകരണ കൗൺസിൽ രാജ്യങ്ങളിലെ ഏറ്റവും ഉയർന്ന അനുപാതമാണിത്. 2024 ഫെബ്രുവരി മുതലുള്ള പബ്ലിക് അതോറിറ്റി ഫോർ സിവിൽ ഇൻഫർമേഷൻ ഡാറ്റ അനുസരിച്ച് സർക്കാർ, സ്വകാര്യ മേഖലയിലെ തൊഴിലാളികൾ 1.9 ദശലക്ഷമാണ്. ഇവരിൽ 75 ശതമാനം സ്വകാര്യ മേഖലയിൽ ജോലി ചെയ്യുന്നവരാണ്. എന്നാൽ സമീപകാലത്തെ സെൻസസ് പ്രകാരം കുവൈറ്റിലെ 4.6 ദശലക്ഷം ജനസംഖ്യയിൽ നിലവിൽ ഏകദേശം 3.2 ദശലക്ഷം പ്രവാസികളാണ്.
