67–ാമത് കേരളപ്പിറവി ദിനാഘോഷങ്ങളുമായി ബന്ധപ്പെട്ട് കേരള സർക്കാർ ഒരുക്കിയ ‘കേരളീയം – 2023’ സാംസ്കാരികോത്സവത്തിന് ഗിന്നസ് നേട്ടം. 67 വ്യത്യസ്ത ഭാഷകളിലായി 67 പേർ ഓൺലൈൻ വിഡിയോ മുഖേന കേരളപ്പിറവി ആശംസകൾ നേർന്നതിലൂടെയാണ് കേരളീയത്തിന് ഈ ഗിന്നസ് നേട്ടം സ്വന്തമാക്കാനായത്. ഇത്രയധികം ആളുകൾ ഇത്രയധികം ഭാഷകളിൽ ഒരേ സമയം ആശംസ നേരുന്ന ‘ഓൺലൈൻ വിഡിയോ റിലേ’ ചരിത്രത്തിൽ ആദ്യമാണെന്ന് ഗിന്നസ് അധികൃതർ അറിയിച്ചു.
മുഖ്യമന്ത്രി പിണറായി വിജയന്റെ ആശംസയോടെ ആരംഭിച്ച ഓൺലൈൻ വിഡിയോ റിലേയിൽ ചീഫ് സെക്രട്ടറി ഡോ.വി.വേണു മലയാള ഭാഷയുടെ പ്രതിനിധിയായി. ഇതിന് ശേഷം വിവിധ സംസ്ഥാനങ്ങളിൽ നിന്നുളള കേരള കേഡർ സിവിൽ സർവീസ് ഉദ്യോഗസ്ഥർ അവരുടെ മാതൃഭാഷകളിൽ കേരളപ്പിറവി ആശംസകൾ നേർന്നു. കൂടാതെ കിഫ്ബി ഉദ്യോഗസ്ഥരും ഈ നേട്ടത്തിന്റെ ഭാഗമായി. മാത്രമല്ല, വിവിധ മേഖലകളിൽ നിന്നുള്ള ലോക കേരള സഭാംഗങ്ങൾ, കെഎസ്എഫ്ഇ പ്രവാസി ചിട്ടിയുടെ ഉപയോക്താക്കൾ, പ്രവാസി ഡിവിഡന്റ് സ്കീമിലെ അംഗങ്ങൾ എന്നിവരും ഈ ദൗത്യത്തിൽ പങ്കാളികളായി. ഇവരെ കൂടാതെ ഒട്ടേറെ വിദേശ പൗരന്മാരും അവരുടെ ഭാഷകളിൽ കേരളപ്പിറവി ആശംസകൾ നേർന്നതാണ് ഈ റെക്കോർഡ് നേട്ടത്തിന്റെ തിളക്കം വർധിപ്പിച്ചത്.
കേരളയത്തിന് ഗിന്നസ് നേട്ടം സ്വന്തമാക്കാനുള്ള ഉദ്യമത്തിന്റെ സംഘാടനത്തിൽ മുഖ്യ പങ്കുവഹിച്ചത് ദുബായ് ആസ്ഥാനമായ ‘റേഡിയോ കേരളം 1476 എ.എം’യാണ്. ഹിന്ദി, ഉർദു, മണിപ്പൂരി, ഗുജറാത്തി തുടങ്ങി ലിപിയുള്ള വിവിധ ഇന്ത്യൻ ഭാഷകൾക്ക് പുറമേ ജാപനീസ്, മലായ്, സ്പാനിഷ്, റഷ്യൻ തുടങ്ങി നിരവധി വിദേശ ഭാഷകളിലുള്ള ആശംസകളും ‘കേരളീയ’ത്തിന്റെ ഗിന്നസ് ദൗത്യത്തിൽ പ്രധാന ആകർഷണമായി. മാത്രമല്ല, അത്ര പ്രശസ്തമല്ലാത്ത ആഫ്രിക്കയിലെ വിവിധ പ്രാദേശിക ഭാഷകളിൽ വരെ ആശംസകൾ സമാഹരിക്കുവാൻ അണിയറ പ്രവർത്തകർക്ക് സാധിച്ചു. ‘മലയാളി ഡയസ്പോറ’ ഇന്ന് ആഗോള തലത്തിൽ വ്യാപിച്ചു കിടക്കുന്ന ഒരു സമൂഹമാണ്. കേരളവും അതിന്റെ സംസ്കാരവും ഇന്ന് ലോകത്തിന് സുപരിചിതമല്ല. ‘ആഗോള കേരളം’ എന്ന സങ്കല്പത്തിന്റെ സാക്ഷാത്കാരമാണ് ഈ ഗിന്നസ് നേട്ടമെന്നും ഔദ്യോഗിക വൃത്തങ്ങൾ അറിയിച്ചു.
