ഖത്തറിലേക്ക് പോവുന്ന ഇന്ത്യക്കാർക്ക് ശ്രദ്ധിക്കേണ്ട ചില കാര്യങ്ങളുണ്ട്. ഇല്ലെങ്കിൽ ജയിൽവാസം അനുഭവിക്കേണ്ടി വരും, സൂക്ഷിക്കുക! ലഹരി വസ്തുക്കളും നിരോധിത മരുന്നുകളും കൈവശം വെച്ച് ഖത്തറിലേക്ക് യാത്രചെയ്യുന്ന ഇന്ത്യക്കാർ പിടിയിലാകുന്ന സംഭവങ്ങളുടെ പശ്ചാത്തലത്തിൽ മുന്നറിയിപ്പുമായി എത്തിയിരിക്കുകയാണ് ഇന്ത്യൻ എംബസി. യാത്രയിൽ നിരോധിത വസ്തുക്കളും മയക്കുമരുന്നുകളും കൈവശമില്ലെന്ന് ഓരോ യാത്രക്കാരനും ഉറപ്പുവരുത്തണമെന്ന് സാമൂഹിക മാധ്യമങ്ങളിൽ പങ്കുവെച്ച സന്ദേശത്തിൽ എംബസി ഓർമിപ്പിച്ചു.
നിരോധിത വസ്തുക്കളുമായി യാത്രചെയ്ത നിരവധി ഇന്ത്യക്കാര്‍ രാജ്യത്ത് നിയമനടപടികള്‍ നേരിടുന്നുണ്ട്. അത്തരത്തിൽ നിയമ ലംഘനങ്ങളിൽ പിടിക്കപ്പെടുന്നവർ വിചാരണയും കടുത്ത നടപടികളും നേരിടേണ്ടിവരും. രാജ്യത്ത് നിരോധിച്ച മരുന്നുകളുടെ പട്ടിക നേരത്തേ തന്നെ ഖത്തർ ആഭ്യന്തര മന്ത്രാലയ അധികൃതർ പ്രസിദ്ധീകരിച്ചിരുന്നു. കുറിപ്പടിയില്ലാതെ മരുന്നുകളും, സ്വന്തം ആവശ്യത്തിനല്ലാത്ത മരുന്നുകളും കൊണ്ടുവരുന്നതിനുമെല്ലാം വിലക്കുണ്ട്. ഇത്തരത്തിൽ വിവിധ കേസുകളിലായി പിടിക്കപ്പെട്ട നിരവധി ഇന്ത്യക്കാരാണ് ജയിൽ ശിക്ഷ അനുഭവിച്ചുകൊണ്ടിരിക്കുന്നത്.
