ഷാർജയിലെ പുതിയതായി പണികഴിപ്പിച്ച അൽ ഖറായിൻ പാർക്ക്-2 പൊതുജനങ്ങൾക്കായി തുറന്നുനൽകി. ഏകദേശം 17.3 ഏക്കർ വിസ്തൃതിയിലാണ് പുതിയ പാർക്ക്. വിശാലമായ പാർക്കിന് ഏകദേശം 17-ലധികം ഫുട്ബോൾ മൈതാനങ്ങളുടെ വിസ്തൃതിയാണുളളത്.
സുപ്രീം കൗൺസിൽ അംഗവും ഷാർജ ഭരണാധികാരിയുമായ ഹിസ് ഹൈനസ് ഡോ ഷെയ്ഖ് സുൽത്താൻ ബിൻ മുഹമ്മദ് അൽ ഖാസിമിയുടെ നിർദേശപ്രകാരമാണ് പുതിയ പാർക്ക് സ്ഥാപിച്ചത്. ഷാർജ മുനിസിപ്പൽ കൗൺസിലും ഷാർജ സിറ്റി മുനിസിപ്പാലിറ്റിയും ചേർന്നാണ് 70,085 ചതുരശ്ര മീറ്റർ (7.085 ഹെക്ടർ അല്ലെങ്കിൽ ഏകദേശം 17.3 ഏക്കർ) സ്ഥലം പാർക്കിനായി കണ്ടെത്തുകയും പദ്ധതി വികസിപ്പിക്കുകയും ചെയ്തത്.
പുതിയ പാർക്ക് എമിറേറ്റിലെ ഹരിത പദ്ധതിയെ ശക്തിപ്പെടുത്തുന്നതാണ്. കുടുംബങ്ങളുടെ സ്വകാര്യത സംരക്ഷിക്കുന്നതിനൊപ്പം ഗുണനിലവാരമുള്ള സേവന സൗകര്യങ്ങളും പ്രദാനം ചെയ്യുന്നുണ്ട്. ഫുട്ബോൾ മൈതാനം,കുട്ടികളുടെ കളിസ്ഥലം,വിശ്രമ സൌകര്യങ്ങൾ എന്നിവയും ഒരുക്കിയിട്ടുണ്ട്.
ഷാർജ മുനിസിപ്പൽ കൗൺസിൽ ചെയർമാൻ സലേം അലി അൽ മുഹൈരി, മുവൈലെ സബർബ് കൗൺസിൽ ചെയർമാൻ ഖാലിദ് അബ്ദുല്ല അൽ റബൂയി, അൽ ഹംരിയ മുനിസിപ്പാലിറ്റി ഡയറക്ടർ മുബാറക് അൽ ഷംസി, മറ്റ് ഷാർജ കൗൺസിൽ അംഗങ്ങളും നഗരസഭ ഉദ്യോഗസ്ഥരും ഉദ്ഘാടന ചടങ്ങിൽ പങ്കെടുത്തു.
