കോട്ടയം വടവാതൂർ സ്വദേശി നേവിസ് സാജൻ മാത്യുവിന്റെ 27–ാം പിറന്നാളായിരുന്നു കഴിഞ്ഞ ദിവസം. ആരാണ് ഈ നേവിസ് സാജൻ? നേവിസിനെ അടുത്തറിഞ്ഞാൽ ഇനി ആരും മറക്കില്ല പേരും പിറന്നാളും. ഇന്ന് ഈ ഭൂമിയിൽ നേവിസില്ല.
രക്തത്തിലെ പഞ്ചസാരയുടെ അളവു താഴ്ന്നതു മൂലം അബോധാവസ്ഥയിലായ നേവിസിന്റെ മരണം 2021 സെപ്റ്റംബർ 25നായിരുന്നു. അവയവ ദാനത്തിലൂടെ നേവിസ് 7 പേർക്കു ജീവൻ പകർന്നാണ് ഈ ലോകത്ത് നിന്ന് വിടവാങ്ങിയത്. നേവിസിന്റെ ഓർമകളുമായി കൊച്ചി അമൃത ആശുപത്രിയിൽ ഈ ഏഴുപേരും ഒത്തുകൂടി.
ഇവരിൽ കൈകൾ മാറ്റിവച്ച കർണാടക ബെള്ളാരി സ്വദേശി ബസവന ഗൗഡ, ഹൃദയം മാറ്റിവച്ച കണ്ണൂർ സ്വദേശി കെ. പ്രേംചന്ദ്, കരൾ മാറ്റിവച്ച നിലമ്പൂർ സ്വദേശി വിനോദ്, വൃക്ക മാറ്റിവച്ച തൃശൂർ സ്വദേശി ബെന്നി, നേത്രപടലം മാറ്റിവച്ച കോട്ടയം സ്വദേശി ലീലാമ്മ എന്നിവരായിരുന്നു ഒന്നിച്ചുകൂടിയത്. അവന്റെ പിറന്നാൾ ദിനത്തിൽ ഒരു കേക്കും മുറിച്ചു. ആ കേക്കിൽ നിന്ന് നേവിസിന്റെ കൈകൾകൊണ്ട് അവന്റെ അച്ഛൻ കേക്ക് വാങ്ങി കഴിച്ചു. അത് വെറുമൊരു കേക്കിന്റെ കഷണമായിരുന്നില്ല. താൻ ജീവൻ നൽകിയ സ്വന്തം മകന്റെ കൈകളായിരുന്നു. ഒപ്പം നേവിസിന്റെ പിതാവ് സാജൻ മാത്യുവിനൊപ്പം മാതാവ് ഷെറിൻ ആനിയും സഹോദരങ്ങൾ എൽവിസും വിസ്മയയും ഒത്തുചേർന്നിരുന്നു.
