ആർട്ടിഫിഷ്യൽ ഇന്റലിജൻസ് ദുരുപയോഗം ചെയ്യുന്നവർക്ക് സൂക്ഷിക്കുക! നിങ്ങൾക്ക് പിടി വീഴും. എഐയുടെ ദുരുപയോഗം നിയന്ത്രിക്കാനുള്ള നിയമത്തിന് ബഹ്‌റൈൻ ശൂറ കൗൺസിൽ അഗീകാരം നൽകിയിരിക്കുകയാണ്. നിയമലംഘകർക്ക് മൂന്ന് വർഷത്തിൽ കുറയാത്ത തടവോ 2,000 ദീനാർ വരെ പിഴയോ ശിക്ഷ ലഭിക്കുന്നതാണ് പുതിയ നിയമം.
1) മാനുഷിക ഇടപെടലോ വിലയിരുത്തലോ ആവശ്യമായ തീരുമാനങ്ങൾ എടുക്കുന്നതിന് എ.ഐ സാങ്കേതികവിദ്യകൾ ഉപയോഗിച്ചാൽ 1,000 ദീനാർ വരെ പിഴ നൽകേണ്ടി വരും
2) വ്യക്തികളുടെ സ്വകാര്യതയിലേക്ക് കടന്നുകയറുകയും വ്യക്തിസ്വാതന്ത്ര്യത്തെ ബാധിക്കുകയും സാമൂഹിക മൂല്യങ്ങൾ ലംഘിക്കുകയും ചെയ്യുന്ന എ.ഐ സിസ്റ്റങ്ങൾ പ്രോസസ് ചെയ്യുക, പ്രോഗ്രാം ചെയ്യുക തുടങ്ങിയ കാര്യങ്ങൾ 2,000 ദീനാർ വരെ പിഴ ലഭിക്കും
3) ലൈസൻസ് ഇല്ലാതെ ആർട്ടിഫിഷ്യൽ ഇന്റലിജൻസ് സംവിധാനങ്ങൾ വികസിപ്പിച്ചാൽ 1,000 ദീനാറിനും 10,000 ദീനാറിനും ഇടയിലായിരിക്കും പിഴ
4) അശാന്തി സൃഷ്ടിക്കുക, തീവ്രവാദ പ്രവർത്തനങ്ങൾക്ക് ആഹ്വാനം, അട്ടിമറി, രാഷ്ട്രീയ അസ്വസ്ഥത എന്നിവക്കായി എ.ഐ ഉപയോഗിക്കാൻ ശ്രമിച്ചാൽ മൂന്ന് വർഷത്തിൽ കുറയാതെ ജയിൽ ശിക്ഷ ലഭിക്കും. ഈ കുറ്റം ആവർത്തിച്ചാൽ, സ്ഥാപനം സ്ഥിരമായോ അല്ലെങ്കിൽ കോടതി നിശ്ചയിക്കുന്ന കാലയളവിലേക്കോ അടച്ചുപൂട്ടുകയും ചെയ്യും.
മനുഷ്യാവകാശ കമ്മിറ്റി വൈസ് ചെയർമാൻ അലി അൽ ഷെഹാബിയുടെ നേതൃത്വത്തിലുള്ള അഞ്ച് അംഗങ്ങളാണ് ഈ നിർദേശങ്ങൾ മുന്നോട്ടുവെച്ചത്. ആഭ്യന്തരം, ആരോഗ്യം, കാബിനറ്റ് അഫയേഴ്‌സ്, വിദ്യാഭ്യാസം എന്നിവയുടെ പരിഗണനക്കുശേഷമാണ് നിയമം ശൂറയുടെ നിയമ നിർമാണ, നിയമകാര്യ സമിതിയുടെ അംഗീകാരത്തിനായി ശിപാർശ ചെയ്യപ്പെട്ടത്. നാഷണൽ സ്‌പേസ് സയൻസ് ഏജൻസി, ഇൻഫർമേഷൻ ആൻഡ് ഇ ഗവൺമെന്റ് അതോറിറ്റി, ബഹ്‌റൈൻ പോളിടെക്‌നിക്, ടെലികമ്യൂണിക്കേഷൻസ് റെഗുലേറ്ററി അതോറിറ്റി, തംകീൻ എന്നിവയിലെ ഉദ്യോഗസ്ഥരും ഇത് സംബന്ധിച്ച നിർദേശങ്ങൾ നൽകിയിരുന്നു. എ.ഐയെ നിയന്ത്രിക്കുന്ന ആദ്യത്തെ അന്താരാഷ്ട്ര നിയമം കഴിഞ്ഞ മാസം യൂറോപ്യൻ പാർലമെന്റ് അംഗീകരിച്ചിരുന്നു.
