സൗദി അറേബ്യയുടെ 94-ാമത് ദേശീയ ദിനത്തോടനുബന്ധിച്ച് ദേശീയ പതാക ഉപയോഗിക്കുന്നതിൽ നിയന്ത്രണം ഏർപ്പെടുത്തി ആഭ്യന്തര മന്ത്രാലയം. കേടുപാടുകൾ പറ്റിയതും പഴക്കമേറിയതുമായ പതാകകൾ ഉപയോഗിക്കുന്നത് വിലക്കിയിട്ടുണ്ട്. പതാകയിൽ മറ്റ് അടയാളങ്ങളോ ലോഗോയോ വാചകങ്ങളോ ചിത്രങ്ങളോ ഉൾപ്പെടുത്തരുതെന്നും നിർദേശമുണ്ട്. കൊടിമരത്തിൽ പാറിപറക്കും വിധത്തിലാണ് ദേശീയ പതാക ഉയർത്തേണ്ടതെന്നും മന്ത്രാലയം അറിയിച്ചു.
വ്യാപാരമുദ്രയായോ വാണിജ്യപരമായ പരസ്യ ആവശ്യങ്ങൾക്കായോ അല്ലെങ്കിൽ രാജ്യത്തെ നിയമസംവിധാനം അനുശാസിക്കുന്നതല്ലാതെ മറ്റെന്തെങ്കിലും ഉദ്ദേശ്യങ്ങൾക്കായി ദേശീയ പതാക ഉപയോഗിക്കാൻ പാടില്ല, മൃഗങ്ങളുടെ ശരീരത്തിൽ ദേശീയ പതാക കെട്ടിവെക്കുകയോ അച്ചടിക്കുകയോ ചെയ്യരുത്, കേടുവരുത്തുന്നതോ വൃത്തിരഹിതമായതോ ആയ സ്ഥലത്ത് സൂക്ഷിക്കാൻ പാടില്ല, ഉപയോഗത്തിന് ശേഷം വലിച്ചെറിയരുത് എന്നും മന്ത്രാലയം നിർദേശിച്ചു.
അതോടൊപ്പം, പതാകയുടെ അരികുകൾ അലങ്കരിക്കും വിധം കൂട്ടിച്ചേർക്കലുകൾ നടത്തരുതെന്നും തലതിരിച്ച് ഉയർത്തുകയോ അലക്ഷ്യമായി കെട്ടിവെക്കുകയോ ചെയ്യരുതെന്നും മുന്നറിയിപ്പിലുണ്ട്.
