ലോകമെങ്ങുമുള്ള ഫാൽകൺ പ്രേമികളെ ആകർഷിക്കാൻ ഖത്തർ ഒരുങ്ങി കഴിഞ്ഞു. അൽ ഗന്നാസ് അസോസിയേഷൻ സംഘടിപ്പിക്കുന്ന 15ാമത് ഖത്തർ ഇന്റർനാഷനൽ ഫാൽകൺസ് ആൻഡ് ഹണ്ടിങ് ഫെസ്റ്റിവലായ ‘മർമി’ ഫെസ്റ്റിവലിന് ജനുവരി ഒന്നിന് തുടക്കമാകും. ഫെസ്റ്റിവലിലേക്കുള്ള രജിസ്‌ട്രേഷൻ ആരംഭിച്ചതായി അധികൃതർ അറിയിച്ചു. എന്നാൽ കതാറ കൾച്ചറൽ വില്ലേജിലെ 33ാം നമ്പർ കെട്ടിടത്തിൽ നേരിട്ടുള്ള രജിസ്‌ട്രേഷൻ ചൊവ്വാഴ്ച സമാപിച്ചു. ഓൺലൈൻ രജിസ്‌ട്രേഷൻ തിങ്കളാഴ്ച രാത്രി 11 വരെ തുടരുമെന്ന് അധികൃതർ അറിയിച്ചു.
ജനുവരി ഒന്ന് മുതൽ 27 വരെയാണ് വിവിധ മത്സരങ്ങളോടു കൂടി മർമി ഫെസ്റ്റിവൽ നടക്കുന്നത്. യുനെസ്‌കോയുടെ ആഗോള പൈതൃക പട്ടികയിൽ ഇടം പിടിച്ച പക്ഷിയാണ് ഫാൽകൺ. ഖത്തറിൽ ഫാൽകൺ പക്ഷിയെ വളർത്തുന്നവരും പരിചരിക്കുന്നവരും ഫാൽകൺ പ്രേമികളും ഉൾപ്പെടുന്ന കൂട്ടായ്മയാണ് അൽ ഗന്നാസ് അസോസിയേഷൻ.
ഷെയ്ഖ് ജുആൻ ബിൻ ഹമദ് ആൽഥാനിയുടെ രക്ഷാകർതൃത്വത്തിൽ എല്ലാ വർഷവും അസോസിയേഷൻ നേതൃത്വം വഹിക്കുന്ന മർമി ഫെസ്റ്റിവലിനോടനുബന്ധിച്ച് നിരവധി ടൂർണമെന്റുകളും മത്സരങ്ങളും നടത്താറുണ്ട്. ഹുബാറ പക്ഷികളെ വേട്ടയാടാൻ ഫാൽകണുകളെ അഴിച്ചുവിടുന്ന അൽ തലാഅ ഇവയിലെ പ്രധാന മത്സരമാണ്. കൂടാതെ ഫാൽകണുകളും ഹോമിങ് പ്രാവുകളും തമ്മിൽ പോരാടുന്ന ഹദാദ് അൽ തഹാദി ചാമ്പ്യൻഷിപ്പും ഫെസ്റ്റിവലിന്റെ മറ്റൊരു ആകർഷണമാണ്.
