അബുദാബിയിൽ വെച്ച് തിരുവനന്തപുരം സ്വദേശിയായ യുവാവിനെ കാണാനില്ലെന്ന പരാതിയുമായി കുടുംബം. തിരുവനന്തപുരം പുതിയതുറ സ്വദേശി ഡിക്സൻ സെബാസ്റ്റ്യനെയാണ് കാണാതായത്. കഴിഞ്ഞ 3 മാസമായി ഡിക്സനെ കാണാതായിട്ട്. ഇതോടെ സാധിക്കുന്ന സ്ഥലങ്ങളിലെല്ലാം അന്വേഷിച്ചെങ്കിലും യുവാവിനെ കണ്ടെത്താനായിട്ടില്ലെന്ന് കുടുംബം വേദനയോടെ വ്യക്തമാക്കി.
അബുദാബി മുസഫ ശാബിയ ഒമ്പതിൽ ഇല്ക്ട്രോണിക്സ് സ്ഥാപനത്തിലെ ജീവനക്കാരനായിരുന്നു ഡിക്സൻ സെബാസ്റ്റ്യൻ. കഴിഞ്ഞ വർഷം ഡിസംബറിലാണ് ഡിക്സൻ ജോലിക്കായി അബുദാബിയിലെത്തിയത്. കഴിഞ്ഞ മേയ് 15 മുതലാണ് 26-കാരനായ ഡിക്സനെ കാണാതായത്. നാട്ടിലുള്ള മാതാപിതാക്കളെയും സഹോദരങ്ങളെയും ഫോണിൽ ബന്ധപ്പെടാറുള്ള ഡിക്സന്റെ ഫോൺകോളുകൾ വരാതായതോടെയാണ് യുവാവിനെ കുടുംബം അന്വേഷിച്ച് തുടങ്ങിയത്.
ഇതോടെ മുഖ്യമന്ത്രി, സ്ഥലം എം.പി എന്നിവർ മുഖേന അബുദാബിയിലെ ഇന്ത്യൻ എംബസിക്ക് പരാതി നൽകിയെങ്കിലും ഡിക്സനെ ഇതുവരെ കണ്ടെത്താനായില്ലെന്ന് കുടുംബം വ്യക്തമാക്കി. അതേസമയം, ജോലി ചെയ്യുന്ന സ്ഥാപനവും ഡിക്സനെ കാണാനില്ലെന്ന് ചൂണ്ടിക്കാട്ടി അബുദാബി പൊലീസിന് പരാതി നൽകിയിട്ടുണ്ടെന്നാണ് ഇവർക്ക് ലഭിച്ച വിവരം.
