റെസിഡൻസി വിസ നിയമത്തിൽ വലിയ മാറ്റങ്ങൾ വരുത്താനൊരുങ്ങി കുവൈത്ത്. ഇത് സംബന്ധിച്ച കരട് നിയമം ആഭ്യന്തര പ്രതിരോധ കമ്മിറ്റി പാർലിമെൻ്റിന് സമർപ്പിച്ചു. അടുത്ത മാസം നടക്കുന്ന ദേശീയ അസംബ്ലി സമ്മേളനത്തിൽ കരട് നിയമം ചർച്ച ചെയ്യുമെന്നാണ് റിപ്പോർട്ട്. പുതിയ നിയമം നടപ്പിലാക്കുന്നതോടെ ഇഖാമ വ്യാപാരവും ചൂഷണവും തടയുവാൻ കഴിയുമെന്നാണ് വിലയിരുത്തൽ.
വിസ നിയമത്തിൽ മാറ്റം വരുന്നതോടെ വിദേശികൾക്ക് മൂന്ന് മാസത്തെ സന്ദർശക വിസ അനുവദിക്കും. കൂടാതെ നിബന്ധനകൾക്ക് വിധേയമായി വിസ ഒരു വർഷം വരെ നീട്ടി നൽകുകയും ചെയ്യും. പ്രവാസികളുടെ വിസ, നാടുകടത്തൽ, പിഴകൾ തുടങ്ങിയ 37 ഇനങ്ങളാണ് നിർദ്ദിഷ്ട കരട് നിയമത്തിൽ ഉൾപ്പെടുന്നത്. വിദേശികളെ വിവാഹം കഴിക്കുന്ന കുവൈത്ത് സ്ത്രീകൾക്ക് ഭർത്താവിനെയും കുട്ടികളെയും സ്പോൺസർ ചെയ്യാനുള്ള അവകാശവും കരട് നിയമത്തിലുണ്ട്.
ഇതോടൊപ്പം നിക്ഷേപകർക്ക് 15 വർഷത്തോയ്ക്കും വിദേശികൾക്ക് അഞ്ച് വർഷത്തേയ്ക്കും റെസിഡൻസി പെർമിറ്റ് നൽകാമെന്നും നിർദേശത്തിൽ വ്യക്തമാക്കുന്നുണ്ട്. നിയമം ലംഘിക്കുന്നവർക്ക് മൂന്ന് വർഷം വരെ തടവും 5,000 മുതൽ 10,000 ദിനാർ വരെ പിഴ ചുമത്തും. രാജ്യത്തിന്റെ പൊതു സുരക്ഷ, ധാർമ്മികത തുടങ്ങിയവ ലംഘിക്കുന്നവരെ നാടുകടത്താൻ ആഭ്യന്തര മന്ത്രിക്ക് നിർദ്ദിഷ്ട നിയമം അധികാരവും നൽകുന്നുണ്ട്. റസിഡൻസി പെർമിറ്റുകൾക്കും പുതുക്കലുകൾക്കും എൻട്രി വിസകൾക്കുമുള്ള ഫീസ് നിർണ്ണയിക്കുന്നത് മന്ത്രിതല തീരുമാനം അനുസരിച്ചായിരിക്കും.
