കള്ളപ്പണം വെളുപ്പിക്കുന്നത് തടയുന്നതിനും, തീവ്രവാദ ധനസഹായം തടയുന്നതിനുമായി ക്രിപ്റ്റോകറൻസികൾ ഉൾപ്പടെ വിർച്വൽ അസറ്റുകൾക്ക് കുവൈറ്റിൽ നിയന്ത്രണം.
പ്രാദേശിക മാധ്യമങ്ങളാണ് ഇക്കാര്യം റിപ്പോർട്ട് ചെയ്തത്.
കുവൈറ്റ് നാഷണൽ കമ്മിറ്റി ഫോർ കോമ്പാറ്റിങ്ങ് മണി ലൗൻഡറിങ്ങ് ആൻഡ് ഫൈനാൻസിങ്ങ് ഓഫ് ടെററിസം അംഗങ്ങളായ ക്യാപിറ്റൽ മാർകറ്റ്സ് അതോറിറ്റി, സെൻട്രൽ ബാങ്ക് ഓഫ് കുവൈറ്റ്, മിനിസ്ട്രി ഓഫ് കോമേഴ്‌സ് ആൻഡ് ഇൻഡസ്ട്രി, ഇൻഷുറൻസ് റെഗുലേറ്ററി അതോറിറ്റി തുടങ്ങിയ വകുപ്പുകൾ ചേർന്നാണ് സർക്കുലർ പുറത്തിറക്കിയത്.
ഇതോടെ രാജ്യത്ത് പണമിടപാടുകൾക്കും, നിക്ഷേപത്തിനുമായി വിർച്വൽ അസറ്റുകൾ ഉപയോഗിക്കുന്നതിന് സമ്പൂർണ്ണ വിലക്കാണ് ഉണ്ടാവുക. ക്രിപ്റ്റോകറൻസികൾ പേയ്‌മെന്റ് ഉപകരണങ്ങളാക്കുന്ന നീക്കവും അനുവദിക്കില്ല.
വെർച്വൽ അസറ്റുകൾ കൈകാര്യം ചെയ്യുന്നതിലെ അപകടങ്ങളും അധികാരികൾ ചൂണ്ടിക്കാട്ടുന്നു. നിയമപരമായ പിന്തുണയുടെ അഭാവവും ഊഹക്കച്ചവടവും പ്രതിസന്ധികളിലേക്ക് നയിക്കുമെന്നാണ് മുന്നറിയിപ്പ്.
