ഹേമ കമ്മിറ്റി റിപ്പോർ‍ട്ട് പുറത്തുവന്നതിന് പിന്നാലെ നിരവധി പേരാണ് മലയാള സിനിമയുമായി ബന്ധപ്പെട്ട പല വെളിപ്പെടുത്തലുകളും നടത്തുന്നത്. ഇപ്പോൾ തന്റെ ‘പവർ ഗ്രൂപ്പ്’ വെളിപ്പെടുത്തിയിരിക്കുകയാണ് നടനും നിർമ്മാതാവുമായ കുഞ്ചാക്കോ ബോബൻ. താരത്തിന്റെ പോസ്റ്റ് സോഷ്യൽ മീഡിയ ഏറ്റെടുത്തിട്ടുമുണ്ട്.
‘എന്റെ പവർ ഗ്രൂപ്പ്’ എന്ന കുറിപ്പോടെ ഭാര്യയ്ക്കും മകനും ഒപ്പമുള്ള വീഡിയോയാണ് കുഞ്ചാക്കോ ബോബൻ പങ്കുവെച്ചിരിക്കുന്നത്. അധികം വൈകാതെ താരത്തിന്റെ പോസ്റ്റ് സാമൂഹ്യമാധ്യമങ്ങളിൽ ചർച്ചയാകുകയും ചെയ്തു. ഹേമ കമ്മിറ്റിക്ക് മുൻപിൽ വ്യക്തമാക്കിയ കാര്യങ്ങൾ പൊതുഇടത്തിൽ തുറന്നു പറയുന്നു എന്ന ആമുഖത്തോടെ സംവിധായിക സൗമ്യ സദാനന്ദൻ പോസ്റ്റ് പങ്കിട്ടതിന് പിന്നാലെയായിരുന്നു താരത്തിൻ്റെ വീഡിയോ പ്രത്യക്ഷപ്പെട്ടത്.
സിനിമയിലെ നല്ല ആൺകുട്ടികൾക്ക് പോലും മറ്റൊരു മുഖമുണ്ടെന്നും തൻ്റെ ആദ്യ സിനിമ അനുവാദമില്ലാതെ പ്രധാന നടനും സഹനിർമ്മാതാവും എഡിറ്റ് ചെയ്തെന്നും ആരോപിച്ചായിരുന്നു സൗമ്യയുടെ പോസ്റ്റ്. പലരും ഈ പോസ്‌റ്റുമായി ബന്ധപ്പെടുത്തിയാണ് കുഞ്ചാക്കോ ബോബന്റെ വീഡിയോയ്ക്ക് കമൻ്റുകൾ രേഖപ്പെടുത്തിയത്. കുഞ്ചാക്കോ ബോബൻ നായകനായെത്തിയ ‘മാംഗല്യം തന്തുനാനേന’ എന്ന സിനിമയുടെ സംവിധായികയാണ് സൗമ്യ സദാനന്ദൻ.
