കേരളത്തിന് സ്വന്തമായൊരു ഓൺലൈൻ ഓട്ടോ ടാക്സി സർവീസ് വരുന്നു. കേരള സവാരി എന്ന് പേരിട്ടിരിക്കുന്ന പദ്ധതി ചിങ്ങം 1 മുതൽ തുടങ്ങും. ഓലയ്ക്കും ഊബറിനും പകരക്കാരൻ ആയാണ് ഓൺലൈൻ ഓട്ടോ ടാക്സി സർവീസ് വരുന്നത്. 500 ഡ്രൈവർമാർക്ക് പരിശീലനം നൽകിക്കഴിഞ്ഞതായി അധികൃതർ അറിയിച്ചു.
തർക്കങ്ങളും ആശയകുഴപ്പങ്ങളും ഇല്ലാത്ത സുരക്ഷിത യാത്രയാണ് കേരള സവാരി പ്രധാനമായും ലക്ഷ്യമിടുന്നത്. ഐ ടി , പൊലീസ് വകുപ്പുകളുടെ സഹകരണത്തോടെ നടപ്പാക്കുന്ന പദ്ധതിയുടെ ആദ്യഘട്ടം തിരുവനന്തപുരത്താണ് തുടങ്ങുക. സർക്കാർ മേഖലയിലെ ആദ്യ ഓട്ടോ ടാക്സി സംവിധാനം ഇതോടെ യാഥാർഥ്യമാകും.
ഊബർ, ഓല മാതൃകയിൽ കേരള സവാരി എന്ന പേരിൽ ഓൺലെൻ ഓട്ടോ, ടാക്സി സേവനം തുടങ്ങാമെന്നത് സംബന്ധിച്ച് കേരള മോട്ടോർ ട്രാൻസ്പോർട്ട് വർക്കേഴ്സ് വെൽഫെയർ ഫണ്ട് ബോർഡാണ് സർക്കാറിന് നിർദേശം സമർപ്പിച്ചത്. പരീക്ഷണാടിസ്ഥാനത്തിൽ 2021 നവംബർ 1ന് തിരുവനന്തപുരത്ത് പദ്ധതിക്ക് തുടക്കമാകുമെന്ന് പ്രഖ്യാപിച്ചിരുന്നെങ്കിലും പലവിധ കാരണങ്ങളാൽ നീണ്ടുപോവുകയായിരുന്നു.
24 മണിക്കൂറും പ്രവർത്തിക്കുന്ന കാൾ സെന്‍ററാണ് പദ്ധതിയുടെ ഏറ്റവും വലിയ പ്രത്യേകത. സോഫ്റ്റ്‍വെയർ, ജി പി എസ് ഏകോപനം, കാൾ സെന്‍റർ എന്നിവ സജ്ജമാക്കിക്കൊണ്ടിരിക്കുകയാണ്. പൊതുജനങ്ങൾക്ക് ഓട്ടോ ടാക്സി ബുക്ക് ചെയ്യാൻ മൊബൈൽ ആപ്പും ലഭ്യമാക്കും.
