നിയമസഭാ തിരഞ്ഞെടുപ്പിലെ വോട്ടെണ്ണൽ പുരോഗമിക്കുന്ന കർണാടകയിൽ കോൺഗ്രസ് കേവല ഭൂരിപക്ഷത്തിലേക്കെന്ന് റിപ്പോർട്ട്. സംസ്ഥാത്തെ 6 മേഖലകളിൽ 4 ലും കോൺഗ്രസ് ആണ് മുന്നിൽ. ബെംഗളൂർ നഗരമേഖലയിലും തീരദേശ കർണാടകയിലുമാണ് ബിജെപി മുന്നിട്ടു നിൽക്കുന്നത്. കോൺഗ്രസിന്റെ പ്രമുഖ നേതാക്കളെല്ലാം ലീഡ് ചെയ്യുമ്പോഴും ബിജെപി വിട്ട് എത്തിയ ജഗദീഷ് ഷെട്ടറിന്റെ ലീഡ് നില മാറി മറിയുന്നു.
വോട്ടെടുപ്പ് പുരോഗമിക്കുന്ന മണ്ഡലങ്ങളിൽ 25 സീറ്റുകൾ നിർണായകമാണ്. ബിജെപി ലീഡ് ചെയ്യുന്ന 9 സീറ്റുകളിലും കോൺഗ്രസ് ലീഡ് ചെയ്യുന്ന 11 സീറ്റുകളിലും നിലവിൽ ഭൂരിപക്ഷം ആയിരത്തിൽ താഴെ മാത്രമാണ്. കോൺഗ്രസിന് സീറ്റ് കുറഞ്ഞാൽ നിർണായകമായേക്കുന്ന ജെഡിഎസിനും ലീഡുചെയ്യുന്ന നാല് സീറ്റിൽ ഭൂരിപക്ഷം ആയിരത്തിൽ താഴെയാണ്.
അതേസമയം ലീഡ് നില മാറിമറയുന്നതിനിടെ ജെഡിഎസ് നേതാവ് എച്ച് ഡി കുമാര സ്വാമിയുമായി കൂടികാഴ്ച നടത്തി ബിജെപി നേതാക്കള്‍. ബെംഗലുരുവിലെ താജ് വെസ്റ്റ് എന്‍ഡ് ഹോട്ടലിലാണ് കൂടിക്കാഴ്ച പുരോഗമിക്കുന്നത്. 118 സീറ്റുകളില്‍ കോണ്‍ഗ്രസ് ലീഡ് തുടരുന്നതിനിടെയാണ് കൂടിക്കാഴ്ച.
