അന്തരിച്ച സംവിധായകൻ സിദ്ദിഖിനെ അനുസ്മരിച്ച് ബോളിവുഡ് താരം കരീന കപൂർ. ഒരു പുഞ്ചിരിയോടെ എല്ലാ കാലവും നിങ്ങൾ ഓർമ്മിക്കപ്പെടും എന്നാണ് താരം കുറിച്ചത്. ഇൻസ്റ്റഗ്രാമിലൂടെയാണ് സിദ്ദിഖിന്റെ ചിത്രം പങ്കുവെച്ച് അദ്ദേഹത്തിന്റെ വിയോഗത്തിലുള്ള ദുഃഖം കരീന രേഖപ്പെടുത്തിയത്.
‘നിങ്ങളെ വല്ലാതെ മിസ് ചെയ്യും, ഒരു ചിരിയോടെ എല്ലാ കാലവും നിങ്ങൾ ഓർമ്മയിലുണ്ടാവും’ എന്നാണ് കരീന സിദ്ദിഖിനെ അനുസ്മരിച്ചത്. സിദ്ദിഖ് സംവിധാനം ചെയ്ത ആദ്യ ബോളിവുഡ് ചിത്രമായ ബോഡിഗാർഡിലെ നായികയായിരുന്നു കരീന കപൂർ. സൽമാൻ ഖാനും കരീനാ കപൂറും ഹെയ്സൽ കീച്ചുമായിരുന്നു ബോളിവുഡ് ബോഡിഗാർഡിൽ മുഖ്യവേഷങ്ങളിലെത്തിയത്. വൻ വിജയം നേടിയ ചിത്രം ഇരുന്നൂറ് കോടിയോളം ബോക്സോഫീസ് കളക്ഷനും സ്വന്തമാക്കിയിരുന്നു.
2010-ൽ സിദ്ദിഖ് സംവിധാനം ചെയ്ത മലയാളം ചിത്രമായ ബോഡിഗാർഡ് അദ്ദേഹംതന്നെ 2011ൽ തമിഴിലേക്കും ഹിന്ദിയിലേക്കും റീമേക്ക് ചെയ്തു. ബോഡിഗാർഡ് എന്ന മലയാളം ചിത്രത്തിൽ ദിലീപ്, നയൻതാര, മിത്ര കുര്യൻ എന്നിവരായിരുന്നു മുഖ്യവേഷങ്ങളിലെത്തിയത്. ചിത്രം വിജയമായതോടെ പിന്നീട് കാവലൻ എന്ന പേരിൽ തമിഴിലും ബോഡിഗാർഡ് എന്ന പേരിൽ ഹിന്ദിയിലും റീമേക്ക് ചെയ്യുകയായിരുന്നു. കാവലനിൽ വിജയ്, അസിൻ, മിത്ര കുര്യൻ എന്നിവരായിരുന്നു പ്രധാന വേഷത്തിലെത്തിയത്.
