ചുവന്ന സ്വര്‍ണമെന്നാണ് കുങ്കുമപ്പൂവിന്റെ അപരനാമം. പെട്രോളിന്‍റെ നാടായ ഇറാനില്‍ യഥേഷ്ടം കൃഷിയുളള സുഗന്ധവ്യഞ്ജനം. കുങ്കുമപ്പൂവ് വാങ്ങുന്നതിനുള്ള ലോകത്തിലെ ഏറ്റവും വലിയ കരാർ ഇറാനുമായി ഒപ്പിട്ടിരിക്കുകയാണ് ഖത്തര്‍.
ഇറാനിൽ നിന്ന് മുപ്പത് കോടി ഡോളറിന്റെ കുങ്കുമപ്പൂവ് വാങ്ങാനാണ് ഖത്തർ കരാർ ഒപ്പുവച്ചിരിക്കുന്നത്. 200 ടൺ ഇറാനിയൻ കുങ്കുമപ്പൂവ് കയറ്റുമതിയ്ക്കാണ് ധാരണ. കരാർ പ്രകാരം ആദ്യ ഷിപ്‌മെന്റ് ഒക്‌ടോബറിൽ ദോഹയിലെത്തുമെന്നാണ് റിപ്പോര്‍ട്ടുകൾ. ഖത്തര്‍ ധനമന്ത്രി അലി ബിൻ അഹമ്മദ് അൽ ഖുവാരിയും ദോഹയിലെ ഇറാനിയൻ സ്ഥാനപതി ഹമീദ്രെസ ദെഹ്ഘാനിയും തമ്മിലാണ് കരാർ ഒപ്പുവച്ചത്.
സുഗന്ധവ്യഞ്ജനം എന്നതിനപ്പുറം ഔഷധ ഗുണവും കുങ്കുമപ്പൂവിന്റെ പ്രിയം വര്‍ദ്ധിപ്പിക്കുന്നതാണ്. ഇറാനുപിന്നാലെ ഇന്ത്യയാണ് കുങ്കുമകൃഷിയില്‍ രണ്ടാമതുളളത്. അ‍‍ഫ്ഗാനിസ്ഥാന് മൂന്നാം സ്ഥാനവും. വിളവെടുപ്പിന്റെയും ഉൽപാദന പ്രക്രിയകളുടെയും സ്വഭാവത്താൽ ലോകത്തിലെ ഏറ്റവും വിലകൂടിയ സുഗന്ധ വ്യജ്ഞനമായാണ് കുങ്കുമപ്പൂ വിശേഷിപ്പിക്കപ്പെടുന്നത്.
ഗുണനിലവാരമേറിയ ഒരു കിലോഗ്രാം കുങ്കുമപ്പൂവിന്‌ ശരാശരി 10,000 ഡോളര്‍ വിലവരും. ഏകദേശം എട്ട് ലക്ഷം രൂപ. പക്ഷേ ഒരുഗ്രാം കുങ്കുമനാരുകൾ ശേഖരിക്കണമെങ്കില്ഡ 150 പൂക്കളെങ്കിലും വേണ്ടിവരും. ഒരു കിലൊ കുങ്കുമപ്പൂവില്‍നിന്ന് 12 ഗ്രാം കുങ്കുമമാണ് ലഭിക്കുക. ഒരുപൂവില്‍നിന്ന മൂപ്പത് മില്ലീഗ്രാമില്‍ താളെ മാത്രമേ അസംസ്കൃത കുങ്കുമം ലഭിക്കൂ. ഉണങ്ങിയാല്‍ 7 മില്ലിഗ്രാം മാത്രമേ ഒരു പൂവില്‍നിന്ന് ലഭ്യമാകൂ.
കാലാവസ്ഥയും മ‍ഴയുടെ ലഭ്യതയും അനുസരിച്ചാണ് കുങ്കുമകൃഷി. ഒക്ടോബര്‍ മാസത്തിലാണ് കുങ്കുമത്തിന്‍റെ പ്രധാന വിളവെടുപ്പ്. ഒരു രാത്രിയുടെ ആയുസ്സേ കുങ്കുമപ്പൂവിനുളളൂ എന്നതും പ്രധാനമാണ്. ഭക്ഷണ വിഭവങ്ങൾക്കും തുണിത്തരങ്ങൾക്കും നിറം നല്‍കുന്നതിനും സുഗന്ധവസ്തുക്ക‍ളുടെ നിര്‍മ്മാണത്തിനും മറ്റും കുങ്കുമപ്പൂ അസംസ്കൃത വസ്തുവാണെങ്കിലും ഔഷധ മേഖലയിലാണ് പ്രധാന ഉപയോഗം.
ലോകത്ത് വിവിധ കുങ്കുമ ഇനങ്ങളില്‍ കാശ്മീരി കുങ്കുമമാണ് സവിശേഷത ഏറിയതെന്നാണ് വിലയിരുത്തല്‍. നീളമുളള കുങ്കുമം എന്നതാണ് കാശ്മീരി കുങ്കുമത്തെ വെത്യസ്തമാക്കുന്നത്. പുതിയൊരു വിളവെടുപ്പുകാലമെത്തുമ്പോൾ കുങ്കുപ്പൂവിന്‍റെ ആഗോളവിപണിയും സജീവമാവുകയാണ്.
