ഫിഫ ലോകകപ്പ് ഫുട്ബാൾ ആരാധകർക്കിടയിൽ ആവേശം സൃഷ്ടിച്ചപ്പോൾ ഖത്തർ നൽകിയ മറ്റൊരു അത്ഭുതമായിരുന്നു ഹയ്യ കാർഡുകൾ. ലോകകപ്പ് വേളയിൽ ആരാധകർക്ക് രാജ്യത്തേക്ക് പ്രവേശിക്കാനുള്ള ഏക ഉപാധിയായിരുന്നു ഹയ്യ. പിന്നീട് ഇത് ഹയ്യ വിസ, ഹയ്യ വിത്ത് മി വിസ എന്നിങ്ങനെയുമായി. ഈ വിസകളുടെ സാധുത ശനിയാഴ്ചയോടെ അവസാനിക്കുകയാണ്. ഫെബ്രുവരി 10ഓടെ ഈ വിസക്കാർക്ക് രാജ്യത്തേക്കുള്ള എൻട്രി അവസാനിച്ചിരുന്നു. മാത്രമല്ല, ഹയ്യ വിസയിൽ രാജ്യത്ത്‌ താമസിക്കുന്നവർ ശനിയാഴ്ചയോടെ ഖത്തറിൽ നിന്ന് മടങ്ങണമെന്നും നിർദേശമുണ്ട്. അല്ലാത്ത പക്ഷം ഇവർ പിഴ ഉൾപ്പെടെ നടപടികൾ നേരിടേണ്ടിവരും. ഈ വർഷം ജനുവരി 10നും 24നുമായി അവസാനിക്കുമെന്നായിരുന്നു അറിയിപ്പ്. പിന്നീട്, ഏഷ്യൻ കപ്പ് ഫുട്ബാൾ മത്സരങ്ങൾക്ക് കൂടി ഖത്തർ വേദിയായതോടെ ഒരു മാസത്തേക്ക് കൂടി കാലാവധി ദീർഘിപ്പിക്കുകയായിരുന്നു.
ലോകകപ്പിന് പിന്നാലെ വിനോദ സഞ്ചാരസാധ്യതകളെ മുന്നിൽകണ്ട് 2022 ജനുവരിയിൽ ഹയ്യ വിസയുടെ കലാവധി ഒരുവർഷത്തേക്ക് ദീർഘിപ്പിച്ചു. കൂടാതെ, വിദേശ കാണികളായ ഹയ്യ വിസ ഉടമകൾക്ക് ബന്ധുക്കളെയും സുഹൃത്തുക്കളെയും ഖത്തറിലെത്തിക്കുന്നതിന് വേണ്ടി ‘ഹയ്യ വിത് മി’ എന്ന പുതിയ വിസയും രാജ്യം അനുവദിച്ചു. ഇതുവഴി മലയാളികൾ ഉൾപ്പെടെ ലക്ഷക്കണക്കിന് ആളുകളാണ് കഴിഞ്ഞ ഒരു വർഷത്തിനിടെ ഖത്തർ സന്ദർശിച്ചത്.
എന്നാൽ ആരും വിഷമിക്കേണ്ടതില്ല. ലോകകപ്പ് ഹയ്യ വിസ കാലാവധി കഴിഞ്ഞെങ്കിലും വിദേശികൾക്ക് ഇനിയും ഖത്തർ സന്ദർശിക്കുന്നതിന് വേണ്ടി നിരവധി വിസകൾ ലഭ്യമാണ്. ഹയ്യ ടു ഖത്തർ ആപ് വഴിയോ ഹയ്യ പോർട്ടൽ വഴിയോ വിവിധ വിസകൾക്കായി അപേക്ഷിക്കാമെന്ന് അധികൃതർ അറിയിച്ചിട്ടുണ്ട്. ദോഹ സന്ദർശിക്കുന്നതിന് ആസൂത്രണം ചെയ്യുന്ന വിനോദസഞ്ചാരികൾക്കും സന്ദർശകർക്കും അനുയോജ്യമായ വിവിധ വിസ കാറ്റഗറികളാണ് ഹയ്യ പോർട്ടലിൽ വാഗ്ദാനം ചെയ്യുന്നത്. ടൂറിസ്റ്റ് വിസ (എ1), ജി.സി.സി റെസിഡൻറ് വിസ (എ2), ഇ.ടി.എ (എ3), ജി.സി.സി പൗരന്മാരുടെ കൂടെ വരുന്നവർക്കുള്ള എ4 വിസ എന്നിങ്ങനെയുള്ള വിസകളാണ് ഹയ്യ പോർട്ടലിലും ഹയ്യ ടു ഖത്തർ ആപ്പിലും അധികൃതർ ഉൾപ്പെടുത്തിയിരിക്കുന്നത്.
എ വൺ വിസ
എല്ലാ രാജ്യക്കാർക്കും ലഭ്യമായ വിസയാണ് എ വൺ വിസ. വിസ അനുവദിച്ചാൽ 100 റിയാൽ അടക്കണം. കുറഞ്ഞത് മൂന്നു മാസത്തെ സാധുതയുള്ള വിസക്ക് അപേക്ഷിക്കാൻ പാസ്‌പോർട്ട് നിർബന്ധമാണ്. കൂടാതെ ഖത്തറിലെ താമസം സ്ഥിരീകരിക്കുന്ന രേഖയും ഇതിനോടൊപ്പം ഹാജരാക്കണം. സിംഗിൾ എൻട്രി, നോൺ റീഫണ്ടബിൾ, കൈമാറ്റം ചെയ്യാൻ കഴിയില്ല എന്നതും എ1 വിസയുടെ സവിശേഷതകളാണ്.
എ2 കാറ്റഗറി വിസ
എല്ലാ പ്രഫഷനുകളിലും ജോലി ചെയ്യുന്ന ജി.സി.സി നിവാസികൾക്കായുള്ളതാണ് ഈ വിസ. വിസ അംഗീകാരത്തിനു ശേഷം 100 റിയാൽ ഫീസായി അടയ്ക്കണം. ഖത്തറിലെ താമസം സ്ഥിരീകരിക്കുന്ന രേഖയും ഇതിനോടൊപ്പം സമർപ്പിക്കേണ്ടത് നിർബന്ധമാണ്. സിംഗിൾ എൻട്രി, നോൺ റീഫണ്ടബിൾ, കൈമാറ്റം ചെയ്യാൻ കഴിയില്ല എന്നിവ എ2 വിസ കാറ്റഗറിക്കും ബാധകമാണ്.
ഇ.ടി.എ അഥവാ എ ത്രീ വിസ
അമേരിക്ക, കാനഡ, ഷെങ്കൻ മേഖല, ന്യൂസിലൻഡ്, ഓസ്‌ട്രേലിയ എന്നിവിടങ്ങളിൽനിന്നുള്ള സാധുവായ വിസയോ താമസാനുമതിയോ ഉള്ളവർക്കാണ് ഈ വിസ ലഭിക്കുക. മൂന്ന് മാസത്തെ കാലാവധിയുള്ള പാസ്‌പോർട്ട്, 100 റിയാൽ ഫീസ് എന്നിവയാണ് ഇതിനാവശ്യമായി വരുന്നത്. ജി.സി.സി പൗരന്മാരുടെ കൂടെ വരുന്നവർക്കുള്ള എ ഫോർ വിസയാണ് അവസാനത്തെ കാറ്റഗറി. അപേക്ഷകർ അവരുടെ ജി.സി.സി പൗരനായ സ്‌പോൺസറോടൊപ്പം യാത്ര ചെയ്യുന്നതിന് ഇത് ഉപയോഗപ്പെടുത്താൻ കഴിയും. കുറഞ്ഞത് മൂന്നു മാസ സാധുതയുള്ള പാസ്‌പോർട്ട്, 100 റിയാൽ എന്നിവ ഈ കാറ്റഗറിക്കാർക്കും നിർബന്ധമാണ്. സിംഗിൾ എൻട്രി, നോൺ റീ ഫണ്ടബിൾ എന്നിവയാണ് എ ത്രീ വിസയുടെ മറ്റു പ്രത്യേകതകൾ.
അതേസമയം ഈ വിസകൾ സന്ദർശനാവശ്യങ്ങൾക്ക് മാത്രമായേ ഉപയോഗിക്കാവൂ. ഒരു സാഹചര്യത്തിലും തൊഴിൽ വിസകളാക്കി മാറ്റാൻ കഴിയില്ലെന്നും അധികൃതർ അറിയിച്ചു. എല്ലാ വിസകളുടെയും സാധുത കുറഞ്ഞത് 30 ദിവസമായിരിക്കും. സന്ദർശകരുടെ ആവശ്യങ്ങൾ നിറവേറ്റുക എന്നതിനപ്പുറം എല്ലാവർക്കും ഖത്തറിലേക്ക് തടസ്സമില്ലാത്ത പ്രവേശനം ഉറപ്പുവരുത്തുക എന്നതുമാണ് ഇതിലൂടെ ലക്ഷ്യമിടുന്നത്.
