ലോകത്തെ ഏറ്റവും മികച്ച വിനോദ കേന്ദ്രങ്ങളെ തെരഞ്ഞെടുക്കുന്ന 2022ലെ ട്രിപ്പ് അഡ്വൈവസര്‍ റേറ്റിങ്ങിൽ അബുദാബിയിലെ പ്രശസ്തമായ ശൈഖ് സായിദ് ഗ്രാന്‍ഡ് മസ്ജിദും ഇടം പിടിച്ചു. യാത്രക്കാരുടെ അഭിപ്രായം, റേറ്റിങ്, വിനോദ കേന്ദ്രത്തിന്റെ അടിസ്ഥാനസൗകര്യങ്ങൾ എന്നിവ വിലയിരുത്തിയാണ് ട്രിപ്പ് അഡ്വൈസര്‍ ഈ പട്ടിക പ്രസിദ്ധീകരിക്കുന്നത്.
‘ട്രാവലേഴ്സ് ചോയ്സ് അവാര്‍ഡ്‌സ്: ദി ബെസ്റ്റ് ഓഫ് ദി ബെസ്റ്റ് ഡെസ്റ്റിനേഷന്‍സ്’ എന്ന വിഭാഗത്തില്‍ മേഖലയില്‍ നിന്ന് ഒന്നാം സ്ഥാനവും ആഗോളതലത്തില്‍ നാലാം സ്ഥാനവുമാണ് ഗ്രാന്‍ഡ് മസ്ജിദ് നേടിയത്. സാംസ്‌കാരിക ചരിത്രകേന്ദ്രങ്ങള്‍ എന്ന വിഭാഗത്തില്‍ ആഗോളതലത്തില്‍ ഗ്രാന്‍ഡ് മസ്ജിദ് ഒമ്പതാം സ്ഥാനം നേടി.
മതപരമായ കാഴ്ചപ്പാടിനപ്പുറം ലോക രാജ്യങ്ങള്‍ക്കിടയില്‍ യുഎഇയുടെ സാംസ്‌കാരികമൂല്യങ്ങള്‍ വിളിച്ചോതുന്ന കേന്ദ്രമാണ് ഗ്രാന്‍ഡ് മസ്ജിദ്. ഇസ്ലാമിക നാഗരികതയെ പുനരുജ്ജീവിപ്പിക്കുന്നതിലും ഗ്രാന്‍ഡ് മസ്ജിദ് വളരെയധികം പങ്കുവഹിച്ചിട്ടുണ്ട്.
