സൗദി അറേബ്യയിലെ അൽ അഹ്സയിൽ ഉണ്ടായ തീ പിടുത്തത്തിൽ 10 പേർ വെന്തു മരിച്ചു. മരിച്ചവരിൽ ഒരാൾ മലയാളിയാണ്. തിരുവനന്തപുരം നെടുമങ്ങാട് അഴീക്കോട്‌ താമസിക്കുന്ന പൂന്തുറ സ്വദേശി നിസാം എന്ന അജ്മൽ ഷാജഹാൻ ആണ് മരിച്ചത്. നജ്മ ബീവിയാണ് ഇദ്ദേഹത്തിന്റെ ഭാര്യ, മുഹമ്മദ് അജ്മൽ, അൽസൽന, അഫ്സൽ എന്നിവരാണ് മക്കൾ.
അല്‍ അഹ്സ ഹുഫൂഫിലുള്ള ഇന്‍ഡസ്ട്രീയല്‍ മേഖലയിലെ വര്‍ക്ക്‌ഷോപ്പിലാണ് അപ്രതീക്ഷിതമായി തീപിടുത്തമുണ്ടായത്. ഇന്നലെ (വെള്ളി) വൈകുന്നേരമായിരുന്നു സംഭവം. മരിച്ചവരിൽ ഒൻപത് പേരും ബംഗ്ലാദേശ് സ്വദേശികൾ ആണെന്നാണ് പുറത്ത് വരുന്ന വിവരം. വര്‍ക് ഷോപ്പിന് മുകളില്‍ താമസിച്ചിരുന്നവരാണ് മരിച്ചവർ. വെള്ളിയാഴ്ച അവധിയായതിനാല്‍ വർക് ഷോപ്പ് ജീവനക്കാരായ ഇവർ പുലര്‍ച്ച വരെ ജോലി ചെയ്തിരുന്നു. ജോലി കഴിഞ്ഞ് ഉറങ്ങുമ്പോഴാണ് തീ പടർന്നത്.
വര്‍ക് ഷോപ്പിന്റെ മറ്റ് പരിസരത്തേയ്ക്കും തീ പടർന്നിരുന്നു. വിവിധ കേന്ദ്രങ്ങളിൽ നിന്നുള്ള പത്തോളം അഗ്നിശമനാ വിഭാഗമെത്തിയാണ് തീ നിയന്ത്രണ വിധേയമാക്കിയത്. പിന്നീട് മുകളിലെ താമസ കേന്ദ്രങ്ങളിൽ നിന്ന് മൃതദേഹങ്ങൾ മാറ്റി.
