ഫൈവ്-സ്റ്റാർ ഗ്ലോബൽ എയർലൈൻ റേറ്റിങ് സ്വന്തമാക്കി യുഎഇയുടെ ദേശീയ വിമാനക്കമ്പനിയായ എത്തിഹാദ് എയർവേയ്‌സ്. എയർലൈൻ പാസഞ്ചർ എക്സ്പീരിയൻസ് അസോസിയേഷനാണ് (അപെക്സ്) ഫൈവ് സ്റ്റാർ ഗ്ലോബൽ എയർലൈനായി എത്തിഹാദിനെ റേറ്റ് ചെയ്തത്. തുടർച്ചയായ മൂന്നാം വർഷമാണ് എത്തിഹാദ് എയർവേയ്‌സ് ഈ അംഗീകാരം സ്വന്തമാക്കുന്നത്.
സെപ്റ്റംബർ 28-ന് ജർമനിയിലെ ഡസൻഡോർഫിലേക്കും 29-ന് കോപ്പൻഹേഗനിലേക്കും ഒക്ടോബർ 1-ന് ഒസാക്കയിലേക്കും എത്തിഹാദ് പുതിയ സർവീസ് ആരംഭിക്കാൻ ഒരുങ്ങുന്നതിനിടെയാണ് ഈ അംഗീകാരം തേടിയെത്തിയത്. ലോകത്തിലെ ഏറ്റവും ഉയർന്ന റേറ്റിങ് ഉള്ള ട്രാവൽ ഓർഗനൈസിങ് ആപ്പായ ട്രിപ്റ്റ് ഫ്രം കോൺകറുമായി സഹകരിച്ച് യാത്രക്കാരുടെ അഭിപ്രായങ്ങൾ ശേഖരിച്ചും സ്ഥിതിവിവരക്കണക്കുകളും അടിസ്ഥാനമാക്കിയാണ് അപെക്സ് ഫൈവ് സ്റ്റാർ എയർലൈൻ അവാർഡുകൾ നൽകുന്നത്.
