യാത്രക്കാർക്ക് ഒരു മാസത്തേക്ക് സൗജന്യ സിറ്റി ചെക്ക് ഇൻ സൗകര്യം ഏർപ്പെടുത്തി ഇത്തിഹാദ് എയർലൈൻ. മിന തുറമുഖത്തും അബുദബി എക്‌സിബിഷൻ കേന്ദ്രത്തിലും പ്രവർത്തിക്കുന്ന ഓഫ് എയർപോർട്ട് ചെക് ഇൻ കേന്ദ്രങ്ങളിലാണ് സേവനം നൽകുന്നത്. അടുത്ത മാസം 14 വരെ ഇവിടെ സൗജന്യ ചെക്ക് ഇൻ സൗകര്യം ഉണ്ടായിരിക്കുമെന്ന് ഇത്തിഹാദ് എയർലൈൻ അറിയിച്ചു.
എയർലൈനിന്റെ മുഴുവൻ സർവീസുകളും അബുദബി വിമാനത്തവാളത്തിലെ പുതിയ ടെർമിനലിലേക്ക് മാറുന്നതിനോട് അനുബന്ധിച്ചാണ് എയർ പോർട്ടിന് പുറത്തുളള കേന്ദ്രങ്ങളിൽ യാത്രക്കാർക്ക് സൗജന്യ ചെക്ക് ഇൻ സേവനം ലഭ്യമാക്കിയിരിക്കുന്നത്. പുതിയ ടെർമിനലിൽ നിന്ന് വ്യാഴാഴ്ചയാണ് ഇത്തിഹാദ് എർലൈനിന്റെ മുഴുവൻ സർവീസുകളും പ്രവർത്തനം ആരംഭിച്ചത്.
മൊറാഫിക് ഏവിയേഷന്റെ കീഴിൽ മിന തുറമുഖത്തെ ചെക് ഇൻ സൗകര്യം 24 മണിക്കൂറും പ്രവർത്തിക്കും. എക്‌സിബിഷൻ സെന്ററിൽ രാവിലെ ഒമ്പതു മുതൽ രാത്രി ഒമ്പതുവരെയാണ് സേവനം ലഭ്യമാക്കുക.ഇത്തിഹാദിനു പുറമെ എയർ അറേബ്യ, വിസ് എയർ, ഈജിപ്ത് എയർ തുടങ്ങിയ കമ്പനികളും യാത്രക്കാർക്കായി കുറഞ്ഞ നിരക്കിൽ ചെക് ഇൻ സൗകര്യം ഏർപ്പെടുത്തിയിട്ടുണ്ട്.
