ദുബായ് മിറാക്കിൾ ഗാർഡൻ യുഎഇ നിവാസികൾക്ക് മാത്രമായി ഒരു പ്രത്യേക ടിക്കറ്റ് നിരക്ക് അവതരിപ്പിച്ചു. മുതിർന്നവർക്കും (അല്ലെങ്കിൽ 12 വയസ്സിന് മുകളിലുള്ളവർക്കും) കുട്ടികൾക്കും (മൂന്നിനും 12 നും ഇടയിൽ പ്രായമുള്ളവർ) പ്രവേശനത്തിന് 65 ദിർഹം ആണ് പുതിയ നിരക്ക്. എമിറേറ്റ്‌സ് ഐഡി ഹാജരാക്കിയാൽ കിഴിവ് നിരക്ക് ലഭിക്കും. ദുബായ് മിറാക്കിൾ ഗാർഡനിലെ പ്രത്യേക കൗണ്ടറുകളിൽ മാത്രമേ ടിക്കറ്റുകൾ വിൽക്കൂ.
പ്രായപൂർത്തിയായ യുഎഇ നിവാസികൾക്കുള്ള ടിക്കറ്റിന് കഴിഞ്ഞ വർഷത്തെ അപേക്ഷിച്ച് 10 ദിർഹം കുറവാണ്. ടിക്കറ്റ് നിരക്ക് 75 ദിർഹം ആയിരുന്നു. എന്നാൽ ഈ വർഷം കുട്ടികൾക്കുള്ള ടിക്കറ്റ് നിരക്കിൽ അഞ്ചു ദിർഹം വർധിച്ചിട്ടുണ്ട്. കഴിഞ്ഞ സീസണിൽ മൂന്ന് മുതൽ 12 വയസ്സുവരെയുള്ള കുട്ടികൾക്ക് 60 ദിർഹമായിരുന്നു.
വിനോദസഞ്ചാരികളെയും മറ്റ് സന്ദർശകരെയും അപേക്ഷിച്ച് യുഎഇ നിവാസികൾക്ക് പ്രത്യേക കിഴിവ് നിരക്കുകൾ നൽകിയിട്ടുണ്ട് എന്ന് ഔദ്യോഗിക വൃത്തങ്ങൾ ആവർത്തിച്ചു. ജനപ്രിയ ശൈത്യകാല ആകർഷണമായ ദുബായ് മിറാക്കിൾ ഗാർഡനിൽ കഴിഞ്ഞ വാരാന്ത്യത്തിലാണ് 12-ാം സീസണിനായി വീണ്ടും തുറന്നത്. എൻട്രി ടിക്കറ്റുകളുടെ വിലകൾ അപ്‌ഡേറ്റ് ചെയ്‌തിട്ടുണ്ട്.
