ദുബായ് ഷോപ്പിങ് ഫെസ്റ്റിവലിന്റെ തീയതി പ്രഖ്യാപിച്ചു. ഡിസംബർ 8 മുതൽ 2004 ജനുവരി 14 വരെയാണ് ഫെസ്റ്റിവൽ നടത്തപ്പെടുക. സംഘാടകരായ ദുബായ് ഫെസ്റ്റിവൽസ് ആന്റ് റീട്ടെയിൽ എസ്റ്റാബ്ലിഷ്മെന്റ് ആണ് 29-ാം വാർഷിക പതിപ്പിന്റെ തീയതി അറിയിച്ചത്.
ഡിസംബർ 8 മുതൽ 10 വരെ ദുബായ് ഡിസൈൻ ഡിസ്ട്രിക്റ്റിൽ നടക്കുന്ന ഉദ്ഘാടന ആഘോഷങ്ങളിൽ സോൾ ഡിഎക്സ്-ബി പങ്കെടുക്കും. ഡിസംബർ 15-ന് കൊക്കകോള അരീനയിൽ അറബ് സംഗീതജ്ഞരായ അഹ്ലം അൽഷംസിയും അസ്സലാ നസ്രിയും വേദിയിലെത്തും. എക്സ്ക്ലൂസീവ് ഷോപ്പിങ് അനുഭവം, രാജ്യാന്തര – പ്രാദേശിക സംഗീതജ്ഞരുടെ സംഗീത പരിപാടികൾ, ബാസ്ക്കറ്റ്ബോൾ മത്സരങ്ങൾ തുടങ്ങി വിവിധ കലാ പരിപാടികൾ അരങ്ങേറും.
38 ദിവസങ്ങളിലായി നടത്തപ്പെടുന്ന പരിപാടികളിൽ ദുബായ് നഗരത്തിലെത്തുന്ന വിനോദ സഞ്ചരികൾക്ക് അസാധാരണമായ ഒരു അനുഭവം പകരാൻ പുതിയ സീസണിനു സാധിക്കുമെന്ന് അധികൃതർ വ്യക്തമാക്കി.
