ജെറ്റ് സ്കീ ഉടമകൾക്കെതിരെ അന്വേഷണം വ്യാപകമാക്കാനൊരുങ്ങി ദുബായ് പൊലീസ്. തുടർച്ചയായി നിയമലംഘനങ്ങൾ നടക്കുന്ന സാഹചര്യത്തിലാണ് ജെറ്റ് സ്കീ ഉടമകൾക്കെതിരെ അധികൃതരുടെ നടപടി. നിയമ ലംഘനങ്ങൾ നടത്തുന്നവർക്കെതിരെ 5,000 ദിർഹം വരെ പിഴ ചുമത്തുമെന്ന് അധികൃതർ വ്യക്തമാക്കി.
ലൈസൻസ് കാലഹരണപ്പെട്ട ജെറ്റ് സ്‌കീകൾ പ്രവർത്തിപ്പിക്കുക, നീന്തൽ മേഖലകൾ, ഹോട്ടൽ ബീച്ചുകൾ തുടങ്ങിയ നിരോധിത മേഖലകളിൽ പ്രവേശിക്കൽ, നിശ്ചിത സമയപരിധിക്കുള്ളിൽ പ്രവർത്തിക്കുന്നതിൽ പരാജയപ്പെടുക, ലൈഫ് ജാക്കറ്റ് ധരിക്കാതിരിക്കുക, പ്രായപൂർത്തിയാകാത്തവർ വിനോദ നാവിക കപ്പലുകൾ പ്രവർത്തിപ്പിക്കുക, കപ്പലുകളിൽ അമിതഭാരം കയറ്റുക എന്നിവയാണ് ലംഘനങ്ങളിൽ ഉൾപ്പെടുന്നത്.
കാലഹരണപ്പെട്ട ലൈസൻസുമായി ജെറ്റ് സ്കീ ഓടിക്കുന്നതിന് 1,000 ദിർഹം പിഴയും അനധികൃത സമയങ്ങളിൽ അത് ഉപയോഗിച്ചാൽ 2,000 ദിർഹം പിഴയും ദുബായിലെ നിരോധിത പ്രദേശങ്ങളിൽ കപ്പൽ കയറുന്ന ജെറ്റ് സ്കീ റൈഡറുകളിൽ നിന്ന് 5,000 ദിർഹം വരെ പിഴയും ഈടാക്കും. കൂടാതെ, ആവശ്യമായ സുരക്ഷാ ഉപകരണങ്ങൾ ധരിക്കാതിരുന്നാൽ 3,000 ദിർഹം പിഴയും ചുമത്തും.
160 നിയമലംഘനങ്ങളാണ് ഇതിനോടകം ജെറ്റ് സ്കീകളുമായി ബന്ധപ്പെട്ട് രജിസ്റ്റർ ചെയ്തത്. ദുബായിലെ വിവിധ ബീച്ച് മേഖലകളിൽ ജെറ്റ് സ്കീ നിയമലംഘനം നടത്തിയതായി പോർട്ട് പോലീസ് സ്റ്റേഷൻ ഡയറക്ടർ ബ്രിഗേഡിയർ ഡോ. ഹസ്സൻ സുഹൈൽ വ്യക്തമാക്കി. കഴിഞ്ഞ രണ്ട് മാസത്തിനിടെ 52 കുറ്റകൃത്യങ്ങൾക്ക് മറ്റ് തരത്തിലുള്ള സമുദ്ര കപ്പലുകളുടെ ഉടമകൾക്കെതിരെയും പൊലീസ് കേസെടുത്തതായി അധികൃതർ അറിയിച്ചു.
