നഷ്ടപരിഹാര നിയമങ്ങൾ ലംഘിച്ചതിന് എയർ ഇന്ത്യയ്ക്ക് പിഴ ചുമത്തി ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡിജിസിഎ). രണ്ടാം തവണയാണ് എയർ ഇന്ത്യയ്ക്ക് പിഴ ചുമത്തുന്നത്. ഡൽഹി, കൊച്ചി, ബാംഗ്ലൂർ വിമാനത്താവളങ്ങളിലെ വിമാന കമ്പനികളിൽ റെഗുലേറ്റർ നടത്തിയ പരിശോധനയിൽ സിവിൽ ഏവിയേഷൻ റിക്വയർമെന്റിന്റെ (സിഎആർ) വ്യവസ്ഥകൾ എയർ ഇന്ത്യ ലംഘിച്ചു എന്ന് കണ്ടെത്തി.
വിമാനങ്ങൾ വൈകുന്നത് മൂലം ബുദ്ധിമുട്ട് നേരിടുന്ന യാത്രക്കാർക്ക് ഹോട്ടൽ താമസ സൗകര്യം നൽകാതിരിക്കുക, ഗ്രൗണ്ട് ഉദ്യോഗസ്ഥർക്ക് നിബന്ധനകൾ അനുസരിച്ചുള്ള പരിശീലനം നൽകാതിരിക്കുക, മോശം സീറ്റുകളിൽ യാത്ര ചെയ്ത അന്താരാഷ്ട്ര ബിസിനസ് ക്ലാസ് യാത്രക്കാർക്ക് നഷ്ടപരിഹാരം നൽകാതിരിക്കുക തുടങ്ങിയ വീഴ്ചകളാണ് ഡിജിസിഎ കണ്ടെത്തിയത്. ഇതിനെ തുടർന്ന് നവംബർ മൂന്നിന് കാരണം കാണിക്കൽ നോട്ടീസ് നൽകിയിരുന്നു.
എന്നാൽ കാരണം കാണിക്കൽ നോട്ടീസിലെ എയർ ഇന്ത്യയുടെ മറുപടി തൃപ്തികരമായിരുന്നില്ല. അതുകൊണ്ട് തന്നെ സിഎആർ വ്യവസ്ഥകൾ പാലിക്കാത്തതിന് പിഴ ചുമത്തിയതായും ഡിജിസിഎ പ്രസ്താവനയിൽ പറഞ്ഞു. 10 ലക്ഷം രൂപയാണ് എയർ ഇന്ത്യ പിഴയായി അടയ്‌ക്കേണ്ടത്.
