നിങ്ങൾ ഭാഗ്യശാലികളാണോയെന്ന് പരീക്ഷിക്കാൻ സുവർണാവസരം വരുന്നു. ജനങ്ങൾ വളരെ ആകാംക്ഷയോടെ കാത്തിരുന്ന യുഎഇ ബിഗ് ടിക്കറ്റ് നറുക്കെടുപ്പ് പുനരാരംഭിക്കുകയാണ്. ഭാഗ്യം പരീക്ഷിക്കാൻ കാത്തിരിക്കുന്നവർക്കെല്ലാം അതിനുള്ള അവസരമാണിത്. ജൂൺ മൂന്നിനാണ് അടുത്ത നറുക്കെടുപ്പ് നടക്കുക.
ഒരു മാസത്തിലധികമായി നിർത്തിവെച്ചിരുന്ന നറുക്കെടുപ്പ് പുനരാരംഭിക്കുമ്പോൾ ജനങ്ങൾക്ക് വമ്പൻ ഓഫറുകളാണ് ബിഗ് ടിക്കറ്റ് നൽകുന്നത്. വരുന്ന നറുക്കെടുപ്പിൽ വിജയിക്കുന്ന ഭാഗ്യശാലിയെ കാത്തിരിക്കുന്നത് 10 ദശലക്ഷം ദിർഹമാണ്. ഈ ഉറപ്പായ സമ്മാനത്തിന് പുറമെ രണ്ട് ടിക്കറ്റുകൾ വാങ്ങുന്ന ഉപഭോക്താക്കൾക്ക് ഒരു ടിക്കറ്റ് സൗജന്യമായി ലഭിക്കുകയും ചെയ്യും.
ജനപ്രിയമായ ബിഗ് ടിക്കറ്റിന്റെ നറുക്കെടുപ്പ് ഏപ്രിൽ ഒന്നിനാണ് താത്കാലികമായി നിർത്തിവെച്ചത്. തുടർന്ന് ഏപ്രിൽ മാസത്തെ അവസാനത്തെ നറുക്കെടുപ്പ് ഏപ്രിൽ 3നാണ് നടന്നത്. യുഎഇ നിയമങ്ങളിലും ചട്ടങ്ങളിലും മാറ്റം വരുത്തിയതിനാൽ എല്ലാ പ്രമുഖ സ്വകാര്യ റാഫിൾ ഡ്രോ ഓപ്പറേറ്റർമാരും ഈ വർഷത്തിൻ്റെ തുടക്കത്തിൽ അവരുടെ പ്രവർത്തനങ്ങൾ താൽക്കാലികമായി നിർത്തി വെയ്ക്കുകയായിരുന്നു. നിരവധി പേർക്ക് പുതിയ ജീവിതം സമ്മാനിച്ച ബിഗ് ടിക്കറ്റ് കഴിഞ്ഞ വർഷം മൊത്തം 24,62,97,071 ദിർഹം സമ്മാനങ്ങളാണ് വിതരണം ചെയ്തത്.
