ചില വാഹനങ്ങൾക്ക് മൂന്ന് ദിവസം അബുദാബിയിലേക്ക് പ്രവേശിക്കാൻ സാധിക്കില്ല. താൽക്കാലിക നിരോധനം ഏർപ്പെടുത്തുമെന്ന് ഇന്റഗ്രേറ്റഡ് ട്രാൻസ്പോർട്ട് സെൻ്റർ ഇന്ന് അറിയിച്ചു. ഡിസംബർ 1 വെള്ളിയാഴ്ച ഉച്ചയ്ക്ക് 12 മണി മുതൽ ഡിസംബർ 4 തിങ്കളാഴ്ച പുലർച്ചെ 1 മണി വരെയാണ് നിരോധനം ഏർപ്പെടുത്തിയിരിക്കുന്നത്.
തൊഴിലാളികളെ അബുദാബിയിലേക്ക് കൊണ്ടുപോകാൻ ഉപയോഗിക്കുന്ന ട്രക്കുകൾ, ബസുകൾ തുടങ്ങിയ ഹെവി വാഹനങ്ങൾക്ക് നിരോധനം ഏർപ്പെടുത്തിയിട്ടുണ്ട്. ഇത്തരം വാഹനങ്ങൾക്ക് ഷെയ്ഖ് സായിദ് പാലം, ഷെയ്ഖ് ഖലീഫ പാലം, അൽ മഖ്ത പാലം, മുസ്സഫ പാലം എന്നിവ ഉൾപ്പെടെയുള്ള പ്രവേശന കവാടങ്ങൾ വഴി അബുദാബി ദ്വീപിൽ പ്രവേശിക്കുന്നതിന് നിയന്ത്രണം ഏർപ്പെടുത്തും.
അതേസമയം പൊതു ശുചീകരണ കമ്പനികളും ലോജിസ്റ്റിക് സപ്പോർട്ട് സേവനങ്ങളും ഉപയോഗിക്കുന്ന വാഹനങ്ങളെ താൽക്കാലിക നിരോധനത്തിൽ നിന്ന് ഒഴിവാക്കിയിട്ടുണ്ട്. മാത്രമല്ല, റോഡ് ഉപയോക്താക്കൾ ജാഗ്രതയോടെ വാഹനമോടിക്കണമെന്നും ട്രാഫിക് നിയമങ്ങളും ചട്ടങ്ങളും പാലിക്കണമെന്നും ഇന്റഗ്രേറ്റഡ് ട്രാൻസ്പോർട്ട് സെന്റർ അഭ്യർത്ഥിച്ചു.
