പ്രവാസികൾ നാട്ടിലേയ്ക്കയക്കുന്ന പണത്തിന് നികുതി ചുമത്താനുള്ള നിയമത്തിന് ബഹ്റൈൻ പാർലമെൻ്റ് അംഗീകാരം നൽകി. ഓരോ തവണയും അയക്കുന്ന തുകക്ക് രണ്ട് ശതമാനമാണ് ലെവി ചുമത്തുക. നിർദേശം അന്തിമ തീരുമാനത്തിനായി സ്‌പീക്കർ അഹമ്മദ് അൽ മുസല്ലം ഉപരിസഭയായ ശൂറ കൗൺസിലിൻ്റെ പരിഗണനക്ക് വിട്ടു.
നികുതി ചുമത്തുന്നതുമായി ബന്ധപ്പെട്ട് എം.പിമാരുടെ നിർദേശത്തെ സർക്കാർ എതിർത്തിരുന്നെങ്കിലും ഒടുവിൽ പാർലമെന്റ് അംഗീകാരം നൽകുകയായിരുന്നു. പണമയക്കുന്നതിന് നികുതി ചുമത്തുന്നത് ഭരണഘടനാ വിരുദ്ധവും അന്യായവുമാണെന്നാണ് സർക്കാർ അഭിപ്രായപ്പെട്ടത്. കൂടാതെ പണം കൈമാറ്റ സ്വാതന്ത്ര്യത്തെക്കുറിച്ച് ലോകമെമ്പാടുമുള്ള രാജ്യങ്ങളുമായി ബഹ്റൈൻ നിരവധി അന്താരാഷ്ട്ര കരാറുകളിലും ഉടമ്പടികളിലും ഒപ്പുവച്ചിട്ടുണ്ട്. അത് ലംഘിക്കാനാവില്ലെന്നായിരുന്നു സർക്കാരിന്റെ നിലപാട്.
പണം കൈമാറ്റം ചെയ്യാനുള്ള സ്വാതന്ത്ര്യത്തിന്റെ ലംഘനമാണ് ലെവിയെന്ന് വ്യക്തമാക്കിയ സർക്കാർ നികുതി ചുമത്താനുള്ള നീക്കം സമ്പദ്‌വ്യവസ്ഥയെയും സാമ്പത്തിക, വാണിജ്യ മേഖലകളെയും പ്രതികൂലമായി ബാധിക്കുമെന്നും വിലയിരുത്തി.
