ടൂറിസ്റ്റ് വിസയിൽ ബഹ്‌റൈനിൽ എത്തിയശേഷം പ്രവാസികൾ തൊഴിൽവിസയിലേക്ക് മാറുന്നതിന് വിലക്കേർപ്പെടുത്തണമെന്ന ആവശ്യവുമായി എംപിമാരുടെ സമിതി. ലേബർ മാർക്കറ്റ് റെഗുലേറ്ററി അതോറിറ്റിയുടെ (എൽ.എം.ആർ.എ) പ്രവർത്തനവുമായി ബന്ധപ്പെട്ട് അന്വേഷിക്കുന്ന സമിതിയുടെ ശുപാർശകളിലാണ് ഈ ആവശ്യം ഉന്നയിച്ചത്. 39 ശിപാർശകളാണ് മംദൂഹ് അൽ സാലിഹ് ചെയർമാനായ സമിതി മുന്നോട്ടുവെച്ചിരിക്കുന്നത്.
അതേസമയം എൽ.എം.ആർ.എ ചെയർമാനും തൊഴിൽ മന്ത്രിയുമായ ജമീൽ ഹുമൈദാനോട് പാർലമെന്റ് സെഷനിൽ ഇക്കാര്യം ചർച്ച ചെയ്യാനായി ചൊവ്വാഴ്ച എത്താൻ ആവശ്യപ്പെട്ടിട്ടുണ്ട്. കൂടാതെ മുതിർന്ന എൽ.എം.ആർ.എ ഉദ്യോഗസ്ഥരേയും വിളിപ്പിച്ചിട്ടുണ്ട്. 2019 മുതൽ 2023 ജൂൺവരെ കാലയളവിൽ ടൂറിസ്റ്റ് വിസയിൽ വന്ന 85,246 പ്രവാസികൾക്ക് വിസ മാറ്റാൻ അനുമതി നൽകിയതായി കമ്മിറ്റി ചൂണ്ടിക്കാട്ടി. 2021ൽ 9424 വിസകളാണ് ഇത്തരത്തിൽ മാറിയിട്ടുള്ളത്. 2022ൽ 46,204 ടൂറിസ്റ്റ് വിസകളും ഇത്തരത്തിൽ തൊഴിൽ വിസകളായി മാറി. ഈ വർഷം ജൂൺവരെ 8598 വിസകളാണ് തൊഴിൽവിസയാക്കിയത്.
പ്രവാസി തൊഴിൽ നയങ്ങളും നടപടിക്രമങ്ങളും പുനഃപരിശോധനക്ക് വിധേയമാക്കുക, എൽ.എം.ആർ.എ വെബ്‌സൈറ്റിൽ സ്വദേശികൾക്ക് മാത്രമായി ജോബ് സെർച്ച് സെക്ഷൻ ആരംഭിക്കുക, എല്ലാ ജോലികളും പ്രാദേശിക പത്രങ്ങളിൽ പരസ്യം ചെയ്യണമെന്ന നിബന്ധന പാലിക്കുന്നുണ്ടോ എന്ന് ഉറപ്പുവരുത്തുക എന്നീ ആവശ്യങ്ങളും റിപ്പോർട്ടിൽ പറയുന്നുണ്ട്. എൽ.എം.ആർ.എ മൂന്ന് മാസം കൂടുമ്പോൾ ബോർഡിന് ഇത് സംബന്ധിച്ച റിപ്പോർട്ട് നൽകണം. മാത്രമല്ല, ഓഡിറ്റ് ചെയ്ത കണക്കുകൾ ഔദ്യോഗിക ഗസറ്റിൽ പ്രസിദ്ധീകരിക്കുകയും ചെയ്യണം. കൂടാതെ സ്വദേശിവത്കരണത്തിന്റെ ഭാഗമായി കൃത്യമായ പദ്ധതി വേണമെന്നും 2006ലെ ലേബർ മാർക്കറ്റ് റെഗുലേറ്ററി നിയമം ഭേദഗതി ചെയ്യണമെന്നും എം.പിമാർ ആവശ്യപ്പെട്ടു.
