ലോകത്തിലാദ്യമായി ആയിരക്കണക്കിന് കിലോമീറ്ററുകൾ സ്കേറ്റിങ് ബോർഡിലൂടെ സഞ്ചരിച്ച് കീഴടക്കണമെന്ന സ്വപ്നം കയ്യെത്തും ദൂരത്തു ബാക്കിയാക്കി അനസ് ലോകത്തോട് വിടപറഞ്ഞു.
പെട്ടന്നൊരു ദിവസം മനസ്സിൽ തോന്നിയ യാത്ര, ജനങ്ങൾക്കിടയിൽ സ്കേറ്റിങിനെ പറ്റി അവബോധമുണ്ടാക്കുക എന്ന ലക്ഷ്യം മനസ്സിലുദിച്ചു. രണ്ട് ജോഡി വസ്ത്രവും ഷൂസും ഹെൽമെറ്റും സ്കേറ്റിംങ് ബോർഡും മാത്രമേ കയ്യിൽ കരുതിയുള്ളു. ബാഗിന്റെ ഭാരം യാത്രയെ ബാധിക്കാതിരിക്കാൻ ഒരു കുപ്പി വെള്ളം പോലും അനസ് കരുതിയിരുന്നില്ല. ലക്ഷ്യം അത്ര കണ്ട് പ്രാധാന്യമർഹിക്കുന്നതായിരുന്നു അനസിന് .
3,800 കിലോമീറ്റർ ആണ് കന്യാകുമാരിയിൽ നിന്നും കാശ്മീരിലേക്ക്. രണ്ടു മാസം കൊണ്ട് ലക്ഷ്യത്തിലെത്താൻ സാധിക്കുമെന്ന് കണക്കുകൂട്ടി ദിവസവും 100 കിലോമീറ്റർ യാത്ര ചെയ്യാൻ തുടങ്ങി. കൂടുതൽ നേരം സ്കേറ്റിംങ് ബോർഡിലുള്ള യാത്ര ആരോഗ്യത്തിന് പ്രശ്നമാണെന്ന് പലരും പറഞ്ഞപ്പോൾ ദിവസം 30 കിലോമീറ്റർ ആയി യാത്ര ചുരുക്കി. 2022 മെയ് 29 ന് കന്യാകുമാരിയിൽ നിന്നുമാണ് അനസ് യാത്രയാരംഭിച്ചത്. മധുര, ബംഗളുരു, ഹൈദരാബാദ്, മദ്ധ്യപ്രദേശ്, ഉത്തർപ്രദേശ് എന്നീ സഥലങ്ങൾ പിന്നിട്ട് ലക്ഷ്യത്തിലെത്താൻ കുറച്ച് ദിവസങ്ങൾക്കൂടി ബാക്കി നിൽക്കെയാണ് ട്രക്കിന്റെ രൂപത്തിൽ അനസിനെ തേടി മരണമെത്തിയത്. ചൊവ്വാഴ്ച പുലർച്ചെ ഹരിയാനയിലെ പഞ്ചഗുളയിൽ വച്ചായിരുന്നു അപകടം. മൃതദേഹം ഹരിയനയിലെ കൽക്ക ആശുപത്രി മോർച്ചറിയിൽ, നിയനടപടികൾക്ക് ശേഷം ബന്ധുക്കൾക്ക് വിട്ട് നൽകും.
കമ്പ്യൂട്ടർ സയൻസിൽ ബിരുദം നേടിയ അനസ് തിരുവനന്തപുരത്തെ ടെക്‌നോപാർക്കിലും ബീഹാറിലെ സ്വകാര്യ സ്കൂളിലും ജോലി ചെയ്തിരുന്നു. മൂന്ന് വർഷമായി അനസ് സ്കേറ്റിംങ് പഠിക്കാൻ തുടങ്ങിയിട്ട്. അതും സ്വന്തമായി തന്നെ, ഒരു വർഷമെടുത്തു സ്കേറ്റിംങ് ബോർഡിൽ ബാലൻസ് ചെയ്തു നിൽക്കാൻ മാത്രം. യാത്ര തുടങ്ങുമ്പോഴും അവസാന നിമിഷങ്ങളിൽ ഹരിയാനയിൽ എത്തിയപ്പോഴുമൊക്കെയുള്ള വീഡിയോ അനസ് സാമൂഹ്യമാധ്യമ അക്കൗണ്ടുകളിലും തന്റെ സ്വന്തം യൂട്യൂബ് ചാനലിലൂടെയും പങ്കു വച്ചിരുന്നു. അതെല്ലാം വേദനയോടെയാണ് ഇന്ന് ആളുകൾ കാണുന്നത്.
തിരുവനന്തപുറം വെഞ്ഞാറമൂട്, പുല്ലാംപാറ പ്രവാസിയായ അലിയാർകുഞ്ഞിന്റെയും ഷൈലബീവിയുടെയും മകനാണ് 31 കാരനായ അനസ് ഹജാസ്. അജിംഷാ, സുമയ്യ എന്നീ സഹോദരങ്ങളും അടങ്ങുന്നതാണ് അനസിന്റെ കുടുംബം.
ഒരു ദിവസം കൊണ്ട് ചിന്തിച് തുടങ്ങിയ യാത്ര, ഒരു നിമിഷം കൊണ്ട് തകർത്തെറിഞ്ഞ ട്രക്ക് അപകടം. ഇല്ലാതായത് അനസ് എന്ന ചെറുപ്പക്കാരന്റെ സ്വപ്നം മാത്രമല്ല, ഒരുപാടുപേർക്ക് പ്രചോദനമകാൻ സാധ്യതയുണ്ടായിരുന്ന ലക്ഷ്യം കൂടിയാണ്.
