ഷാർജയിൽ ഓട്ടിസം ബാധിച്ച മലയാളിയെ കാണാതായി.ഫെലിക്സ് ജെബി എന്ന 18 വയസുകാരനെയാണ് കാണാതായത്. മാതാപിതാക്കൾ ഷാർജ പോലീസിൽ പരാതി നൽകിയിട്ടുണ്ട്. ശനിയാഴ്‌ച ഷാർജ സിറ്റി സെന്ററിന് പിന്നിൽ നിന്ന് രാത്രി 8.45 നാണ് ഫെലിക്സിനെ കാണാതായത്. പച്ച പുൾഓവറും പച്ച ഷോർട്ട്സും ചുവന്ന ടീ ഷർട്ടും ആണ് കാണാതാവുന്ന സമയത്ത് കുട്ടി ധരിച്ചിരുന്ന വസ്ത്രത്തിന്റെ നിറം.
അമ്മയ്ക്കും സഹോദരിക്കുമൊപ്പം സിറ്റി സെന്ററിൽ ഷോപ്പിംഗ് നടത്തുകയായിരുന്നു ഫെലിക്സ്. ഇന്നലെ രാത്രി മുതൽ സിറ്റി സെന്റർ പരിസരത്ത് മുഴുവൻ തിരച്ചിൽ നടത്തിയെങ്കിലും കുട്ടിയെ കണ്ടെത്താൻ കഴിഞ്ഞില്ല. ഇതോടെയാണ് കുടുംബം പോലീസിൽ പരാതി നൽകിയത്. കൂടാതെ സോഷ്യൽ മീഡിയ ഗ്രൂപ്പുകളിലും പോസ്റ്ററുകളിലും കാണാതായ ആൺകുട്ടിയുടെ ചിത്രം കുടുംബം പങ്കുവെച്ചിട്ടുണ്ട്. ഷാർജ പോലീസും തിരച്ചിൽ നടത്തി വരികയാണ്.
