ബോളിവുഡിലെ പ്രിയപ്പെട്ട താരദമ്പതികളാണ് രൺബീർ കപൂറും ആലിയ ഭട്ടും. ഒരുപാട് നാൾ പ്രണയിച്ചതിന് ശേഷം ഇരുവരും കല്യാണം കഴിച്ചതും കുഞ്ഞ് ജനിച്ചതുമെല്ലാം ആരാധകർ ആഘോഷിച്ചിരുന്നു. ഇപ്പോൾ മകൾ റാഹയുമായി ബന്ധപ്പെട്ട് ആലിയ നടത്തിയ ചില വെളിപ്പെടുത്തലുകളാണ് സാമൂഹ്യമാധ്യമങ്ങളിലെ ചർച്ചാ വിഷയം. റാഹ ഉറങ്ങണമെങ്കിൽ ‘ഉണ്ണീ വാവാവോ’ എന്ന മലയാളം താരാട്ടുപാട്ട് പാട്ട് പാടണമെന്നാണ് ആലിയ പറയുന്നത്.
മകൾക്കായി മലയാളം പാട്ട് പഠിച്ചിരിക്കുകയാണ് ഇപ്പോൾ താരദമ്പതികൾ. താരദമ്പതികളുടെ മകളെ പരിചരിക്കുന്നത് മലയാളിയായ ആയയാണ്. കപിൽ ശർമ അവതരിപ്പിക്കുന്ന ദ ഗ്രേറ്റ് ഇന്ത്യൻ കപിൽ ശർമ ഷോ-സീസൺ 2 ഉദ്ഘാടനം ചെയ്യവേ ആയിരുന്നു ആലിയ ഇക്കാര്യം വ്യക്തമാക്കിയത്.
“റാഹയെ ഉറക്കാനായി അവളുടെ ആയ സ്ഥിരം ഉണ്ണീ വാവാവോ എന്ന പാട്ടാണ് പാടിക്കൊടുക്കാറുള്ളത്. ഇതൊരു മലയാളം താരാട്ടുപാട്ടാണ്. ഇടയ്ക്ക് ഞങ്ങളോട് റാഹ പറയും മാമ വാവോ, പാപ്പാ വാവോ എന്ന്. അവൾക്ക് ഉറക്കം വരുന്നു എന്നുള്ളതിൻ്റെ സൂചനയാണത്. ഇപ്പോൾ ഞാനും രൺബീറും അവൾക്കുവേണ്ടി ആ പാട്ട് പഠിച്ചു.” എന്നാണ് ആലിയ പറഞ്ഞത്.
1991-ൽ റിലീസ് ചെയ്‌ത സാന്ത്വനം എന്ന സിബി മലയിൽ ചിത്രത്തിലേതാണ് ഈ താരാട്ടു പാട്ട്. കെ.എസ്. ചിത്ര ആലപിച്ചിരിക്കുന്ന ഗാനത്തിന് മോഹൻ സിത്താരയാണ് സംഗീതം നൽകിയത്. കൈതപ്രം ആയിരുന്നു ഗാനത്തിന്റെ വരികൾ എഴുതിയത്.
