സമുദ്രാതിർത്തി ലംഘനം നടത്തി എന്ന് ആരോപിച്ച് അറസ്റ്റ് ചെയ്ത മലയാളി മൽസ്യത്തൊഴിലാളികളിൽ എട്ട് പേരെ ഇറാൻ മോചിപ്പിച്ചു. എട്ട് മലയാളികളെയും രണ്ട് തമിഴ്നാട് സ്വദേശികളെയുമാണ് ഇറാൻ അറസ്റ്റ് ചെയ്തത്. അജ്മാനിൽ നിന്ന് മൽസ്യ ബന്ധനത്തിന് പോയ ഇവർക്ക് 45 ദിവസത്തെ ജയിൽ വാസത്തിനു ശേഷമാണ് മോചനം ലഭിച്ചത്. എന്നാൽ ഒരു മലയാളിയും ഒരു തമിഴ്നാട്ടുകാരനും മോചനം ലഭിച്ചിട്ടില്ല.
ഇവരുടെ സ്പോൺസറായ സ്വദേശിയും ഇപ്പോൾ ജയിലിൽ കഴിയുകയാണ്. തിരുവനന്തപുരം അഞ്ചുതെങ്ങ് മാമ്പള്ളി സ്വദേശികളായ സാജു ജോർജ്, സ്റ്റാൻലി വാഷിങ്ടൺ, ആരോഗ്യരാജ് വർഗീസ്, ഡിക്സൺ ലോറൻസ്, ഡെന്നിസൺ പൗലോസ്, പത്തനംതിട്ട അടൂർ സ്വദേശിയായ അബ്ദുൽ റഹ്മാൻ എന്നിവരാണ് ഇപ്പോൾ ജയിൽ മോചിതരായത്. കൊല്ലം പറവൂർ സ്വദേശി ഹമീദ് ബദറുദ്ദീനാണ് ഇനി പുറത്തിറങ്ങാനുള്ളത്.
കേസ് നടപടികൾ പൂർണമായും അവസാനിപ്പിച്ചതിന് ശേഷം അടുത്ത രണ്ടാഴ്ചയ്ക്കുള്ളിൽ ഇവർ അജ്മാനിൽ മടങ്ങിയെത്തുമെന്നാണ് സൂചന. ജൂൺ 18ന് ആയിരുന്നു ഇവർ സഞ്ചരിച്ചിരുന്ന ബോട്ട് ഉൾപ്പെടെ ഇറാൻ കസ്റ്റഡിയിൽ എടുത്തത്. എന്നാൽ ശക്തമായ കാറ്റിൽ ദിശമാറി അതിർത്തി കടന്നതാണെന്നാണ് മൽസ്യത്തൊഴിലാളികൾ പറയുന്നത്.
മൽസ്യത്തൊഴിലാളികൾ മോചിപ്പിക്കപ്പെട്ട വിവരം കേന്ദ്ര വിദേശകാര്യ സഹമന്ത്രി വി.മുരളീധരനാണ് ട്വീറ്ററിലൂടെ അറിയിച്ചത്. പുറത്തിറങ്ങിയവർ കുടുംബങ്ങളെ വിവരം അറിയിച്ചിട്ടുണ്ട്. അതേസമയം ബാക്കിയുള്ളവരും അടുത്ത ദിവസങ്ങളിൽ പുറത്തിറങ്ങുമെന്നാണ് സൂചന. ജയിൽ മോചിതരായവർക്ക് ടെഹ്റാനിലെ ഇന്ത്യൻ എംബസി താമസവും ഭക്ഷണവും ഒരുക്കിയിട്ടുണ്ട്.
