പ്രവാസി മലയാളികൾക്ക് ആശ്വാസമായി കേരളത്തിൽ നിന്നുള്ള സർവ്വീസ് പുനരാരംഭിക്കാനൊരുങ്ങി എയർ ഇന്ത്യാ എക്സ്പ്രസ്. തിരുവനന്തപുരത്ത് നിന്ന് നേരിട്ട് റിയാദിലേക്കാണ് എയർലൈൻ സർവ്വീസ് ആരംഭിക്കുന്നത്. പ്രവാസി മലയാളികളുടെ അഞ്ച് വർഷത്തെ കാത്തിരിപ്പാണ് യാഥാർത്ഥ്യമാകുന്നത്.
സെപ്റ്റംബർ 9 മുതൽ എല്ലാ തിങ്കളാഴ്‌ച ദിവസങ്ങളിലുമായിരിക്കും വിമാന സർവീസ് നടത്തുക. തിരുവനന്തപുരത്ത് നിന്ന് വൈകിട്ട് 5.55-ന് പുറപ്പെടുന്ന വിമാനം രാത്രി 10.40-ന് റിയാദിലെത്തും. തിരിച്ച് രാത്രി 11.40-ന് റിയാദിൽ നിന്ന് പുറപ്പെട്ട് പിറ്റേ ദിവസം രാവിലെ 7.30-ന് തിരുവനന്തപുരത്ത് എത്തും.
ഇനി മുതൽ പ്രവാസികൾക്ക് വെറും 5 മണിക്കൂറിനുള്ളിൽ കേരളത്തിൽ നിന്ന് സൗദിയിലെത്താൻ സാധിക്കും. സ്‌കൂൾ അവധിക്കാലം കഴിഞ്ഞ് തിരിച്ചുപോകാനിരിക്കുന്നവർക്കും ഓണം ആഘോഷിക്കാൻ നാട്ടിലേയ്ക്ക് വരാൻ ആഗ്രഹിക്കുന്നവർക്കും എയർ ഇന്ത്യാ എക്സ്പ്രസിന്റെ പുതിയ സർവ്വീസ് ആശ്വാസമാകും.
