വയനാട് കൽപ്പറ്റയിൽ വാഹനത്തിൽ തോട്ടി കൊണ്ട് പോയതിന് എംവിഡി കെഎസ്ഇബിയ്ക്ക് നോട്ടീസ് അയച്ചു. അതേസമയം കറന്റ് ബില്ല് അടയ്ക്കാത്തത്തിന് എംവിഡി ഓഫീസിലെ ഫ്യൂസ് ഊരി കെഎസ്ഇബി പകരം വീട്ടി. വൈദ്യുതി ബിൽ അടയ്ക്കാൻ വൈകിയതുകൊണ്ടാണ് കെഎസ്ഇബി നടപടിയെടുത്തത്. കഴിഞ്ഞയാഴ്ച വാഹനത്തിൽ തോട്ടി കെട്ടിവച്ച് പോയതിന് കെഎസ്ഇബിക്ക് എംവിഡി നോട്ടീസ് അയച്ചിരുന്നു. ജില്ലയിലെ എ ഐ ക്യാമറകളുടെ പ്രവർത്തനം നിയന്ത്രിക്കുന്നത് ഈ ഓഫീസിൽ നിന്നാണ്.
കഴിഞ്ഞ ദിവസം മരത്തിന്റെ ചില്ല വെട്ടാന്‍ തോട്ടി കൊണ്ടുപോയ കെഎസ്ഇബിയുടെ വാഹനത്തിനാണ് എഐ ക്യാമറ നോട്ടീസ് ലഭിച്ചത്. കെഎസ്ഇബി ലൈൻ വർക്കിനായി തോട്ടിയുമായി പോയ വാഹനത്തിനു എഐ ക്യാമറ വക 20500 രൂപ പിഴ അടക്കാനായിരുന്നു നോട്ടീസ് നൽകിയത്. അമ്പലവയൽ ഇലക്ട്രിക്കൽ സെക്ഷൻ ഓഫീസിലെ ജീവനക്കാർക്കായി വാടകയ്ക്കെടുത്ത ജീപ്പിനായിരുന്നു ഫൈൻ.
അതേസമയം ജൂണ്‍ ആറിന് ചാര്‍ജ് ചെയ്ത കേസിന് ജൂൺ 17 നാണ് നോട്ടീസ് വന്നത്. എന്നാൽ കാലങ്ങളായി സമാനമായ രീതിയില്‍ ഓടുന്ന വാഹനത്തിന് ഭീമമായ തുക പിഴയീടാക്കിയത് കെഎസ്ഇബിക്കും തിരിച്ചടിയായി. ഇതിന് പിന്നാലെയാണ് എഐ ക്യാമറകളുടെ പ്രവർത്തനം നിയന്ത്രിക്കുന്ന കെട്ടിടത്തിന്റെ തന്നെ ഫ്യൂസ് ബില്ല് അടയ്ക്കാത്തത്തിന്റെ പേരിൽ കെഎസ്ഇബി ഊരിയത്.
