ഉപാധികളോടെ സിറിയയെ അറബ് ലീഗിൽ തിരിച്ചെടുക്കാൻ ധാരണയായി. പതിനൊന്ന് വർഷം നീണ്ട വിലക്കിന് ശേഷം ഞായറാഴ്ചയാണ് ഇത് സംബന്ധിച്ച തീരുമാനമെടുത്തതെന്ന് അറബ് ലീഗ് വക്താവ് പറഞ്ഞു. സിറിയയുമായി സാധാരണ ബന്ധം സ്ഥാപിക്കാനുള്ള അറബ് രാജ്യങ്ങളുടെ താത്പര്യം മുൻനിർത്തിയാണ് തീരുമാനം.
മേയ് 19ന് സൗദി അറേബ്യയിൽ അറബ് ലീഗ് ഉച്ചകോടി നടക്കാനിരിക്കവെയാണ് സിറിയയെ തിരിച്ചെടുക്കാനുള്ള നിർണായക തീരുമാനം ഇന്ന് ഉണ്ടായിരിക്കുന്നത്. വോട്ടെടുപ്പിലൂടെയാണ് തീരുമാനത്തിന് അംഗീകാരം ലഭിച്ചതെന്നാണ് റിപ്പോർട്ടുകൾ. ഈജിപ്ഷ്യൻ തലസ്ഥാനമായ കെയ്റോയിലെ അറബ് ലീഗ് ആസ്ഥാനത്ത് അംഗരാഷ്‍ട്രങ്ങളിലെ വിദേശകാര്യ മന്ത്രിമാർ പങ്കെടുത്ത യോഗത്തിലാണ് സിറിയയെ തിരിച്ചെടുക്കാനുള്ള തീരുമാനം എടുത്തത്.
2011 മാർച്ചിൽ സിറിയയിലെ പ്രതിഷേധം അടിച്ചമർത്താൻ പ്രസിഡന്റ് ബഷാർ അൽ അസദ് ഉത്തരവിട്ടതിനെ പിന്നാലെയാണ് അറബ് ലീഗ് അംഗത്വത്തിൽ നിന്ന് സിറിയയെ പുറത്താക്കിയത്. ഒരു പതിറ്റാണ്ടിന് ശേഷം ബഷാർ അൽ അസദ് സിറിയയിൽ തന്റെ അധികാരം ഊട്ടിയുറപ്പിച്ച സാഹചര്യത്തിൽ സിറിയയുമായുള്ള ബന്ധം സാധാരണ നിലയിലാക്കാൻ അറബ് രാജ്യങ്ങൾ മുന്നോട്ട് വരികയായിരുന്നു.
