തമിഴ് നടൻ വിജയ് ആന്റണിയുടെ മകൾ വീട്ടിൽ മരിച്ചനിലയിൽ. ചെന്നൈയിലെ തേനാംപേട്ടിലെ വീട്ടിൽ തൂങ്ങി മരിച്ചനിലയിലാണ് പെൺകുട്ടിയെ കണ്ടെത്തിയത്. ചെന്നൈയിലെ സ്വകാര്യ സ്‌കൂളിലാണ് പെൺകുട്ടി പഠിക്കുന്നത്. മാനസിക സമ്മർദ്ദമാകാം മരണകാരണമെന്നാണ് പ്രാഥമിക നിഗമനം.
ഇന്ന് പുലർച്ചെയാണ് സംഭവം. വിജയ് ആന്റണിയുടെ മകൾ മീര പന്ത്രണ്ടാം ക്ലാസ് വിദ്യാർഥിനിയാണ്. ഉടൻ തന്നെ ആശുപത്രിയിലേക്ക് കൊണ്ടുപോയെങ്കിലും ജീവൻ രക്ഷിക്കാൻ സാധിച്ചില്ല.
ചർച്ച് പാർക്ക് സേക്രഡ് ഹാർട്ട് സ്കൂളിലെ 12-ാം ക്ലാസ് വിദ്യാർഥിനി ആയിരുന്നു മീര. പഠനത്തിൽ മികവ് പുലർത്തുന്ന, പാഠ്യേതര പ്രവർത്തനങ്ങളിലും താൽപര്യമുള്ള കുട്ടിയായിരുന്നു. സ്കൂളിലെ കൾച്ചറൽ സെക്രട്ടറി സ്ഥാനത്തേക്ക് ജൂൺ മാസത്തിൽ മീര തെരഞ്ഞെടുക്കപ്പെട്ടിരുന്നു. മകളെക്കുറിച്ച് പലപ്പോഴും അഭിമാനത്തോടെ പറഞ്ഞിട്ടുള്ള അമ്മ ഫാത്തിമ വിജയ് ആൻറണി മകളുടെ ഈ നേട്ടത്തിൻറെ സന്തോഷവും സോഷ്യൽ മീഡിയയിലൂടെ പങ്കുവച്ചിരുന്നു. അതേസമയം മീര കുറച്ച് കാലമായി മാനസിക സമ്മർദ്ദത്തിനുള്ള ചികിത്സ എടുത്തിരുന്നതായാണ് റിപ്പോർട്ടുകൾ.
ആത്മഹത്യ ഒന്നിനും പരിഹാരമല്ല, മാനസികാരോഗ്യ വിദഗ്ധരുടെ സഹായം തേടുക, അതിജീവിക്കാൻ ശ്രമിക്കുക. വിളിക്കൂ 1056
