33-മത് അബുദാബി ഇന്റർനാഷണൽ ബുക്ക് ഫെയർ ഏപ്രിൽ 29 മുതൽ ആരംഭിക്കും. അബുദാബി നാഷണൽ എക്സിബിഷൻ സെന്ററിൽ വെച്ച് നടത്തപ്പെടുന്ന പുസ്തകമേള മെയ് 5 വരെ നീണ്ടുനിൽക്കും.
അബുദാബി ഡിപ്പാർട്മെന്റ് ഓഫ് കൾച്ചർ ആന്റ് ടൂറിസം, അബുദാബി അറബിക് ലാംഗ്വേജ് സെന്റർ എന്നിവർ സംയുക്തമായാണ് ഈ പുസ്തകമേള ഒരുക്കുന്നത്. ബുക്ക് ഫെയറിന് മുന്നോടിയായി നടക്കുന്ന ഇന്റർനാഷണൽ കോൺഗ്രസ് ഓഫ് അറബിക് പബ്ലിഷിങ് ആന്റ് ക്രിയേറ്റീവ് ഇൻഡസ്ട്രീസിന്റെ മൂന്നാമത് പതിപ്പ് ഏപ്രിൽ 28-ന് ആരംഭിക്കും.
ഈജിപ്താണ് ഇത്തവണ പുസ്തകമേളയിലെ വിശിഷ്ടാതിഥിയായി പങ്കെടുക്കുന്നത്. മുൻവർഷങ്ങളുമായി താരതമ്യം ചെയ്യുമ്പോൾ കൂടുതൽ സന്ദർശകർ മേളയിലേയ്ക്ക് എത്തുമെന്നാണ് അധികൃതർ വിലയിരുത്തുന്നത്.
