ലുലു ഹൈപ്പർ മാർക്കറ്റിൽ നിന്ന് ആറ് ലക്ഷം ദിര്‍ഹവുമായി യുവാവ് മുങ്ങിയതായി പരാതി. കണ്ണൂർ നാറാത്ത് സുഹറ മൻസിലിൽ പൊയ്യക്കൽ പുതിയ പുരയിൽ മുഹമ്മദ് നിയാസി (38)നെതിരെയാണ് ആറ് ലക്ഷം ദിര്‍ഹം (ഒന്നര കോടിയോളം രൂപ) അപഹരിച്ചതായി ലുലു ഗ്രൂപ്പ് അബുദാബി പൊലീസിൽ പരാതി നൽകിയത്. അബുദാബി ഖാലിദിയ മാളിലെ ലുലു ഹൈപ്പർ മാർക്കറ്റ് ക്യാഷ് ഓഫീസ് ഇൻ ചാർജായി ജോലി ചെയ്തുവരികയായിരുന്നു മുഹമ്മദ് നിയാസ്.
കഴിഞ്ഞ തിങ്കളാഴ്ച (മാർച്ച് 25) ഉച്ചയ്ക്കുള്ള ഡ്യൂട്ടിക്ക് എത്തേണ്ടിയിരുന്ന നിയാസ് എത്താതായതോടെ ഹൈപ്പർ മാർക്കറ്റ് അധികൃതർ മൊബൈലിൽ ബന്ധപ്പെടാൻ ശ്രമിച്ചെങ്കിലും അത് സ്വിച്ച്ഡ് ഓഫായിരുന്നു. ഇതോടെ സംശയം തോന്നിയ അധികൃതർ നടത്തിയ പരിശോധനയിൽ ഓഫീസിൽ 6 ലക്ഷം ദിർഹത്തിൻ്റെ കുറവ് കണ്ടെത്തുകയായിരുന്നു. ഇതോടെ പൊലീസിൽ പരാതി നൽകുകയും ചെയ്തു. കഴിഞ്ഞ 15 വർഷമായി ലുലു ഗ്രൂപ്പിൽ ജോലി ചെയ്തുവരികയായിരുന്നു നിയാസ്.
ക്യാഷ് ഓഫീസിൽ ജോലി ചെയ്യുന്നതിനാൽ നിയാസിന്റെ പാസ്പോർട്ട് കമ്പനിയാണ് സൂക്ഷിക്കുന്നത്. അതുകൊണ്ടുതന്നെ നിയാസ് യുഎഇ വിടാൻ സാധ്യതയില്ലെന്നാണ് അധികൃതർ പറയുന്നത്. നിയാസിനെ കാണാതായതിന് പിന്നാലെ എറണാകുളം വെണ്ണല ചളിക്കാവട്ടം സ്വദേശിനിയായ ഭാര്യയും രണ്ടു കുട്ടികളും നാട്ടിലേയ്ക്ക് മുങ്ങിയതായാണ് റിപ്പോർട്ട്. എംബസി മുഖാന്തിരം നിയാസിനെതിരെ കേരള പൊലീസിലും ലുലു ഗ്രൂപ്പ് പരാതി നൽകിയിട്ടുണ്ട്.
