മദ്യനയത്തിൽ ഷാപ്പുകൾക്ക്‌ സ്റ്റാർ പദവി നൽകാൻ തീരുമാനിച്ചെന്ന നിലയിൽ ചില മാധ്യമങ്ങളിൽ വരുന്ന വാർത്ത തെറ്റാണെന്ന് എക്സൈസ് മന്ത്രി എംബി രാജേഷ് അറിയിച്ചു. മന്ത്രിയുടെ ഓഫീസ് വാർത്താ കുറിപ്പിലൂടെയാണ് മന്ത്രി ഇക്കാര്യം അറിയിച്ചത്. ബാറുകളെപ്പോലെ ഷാപ്പുകൾക്കും സ്റ്റാർ പദവി നൽകാൻ പുതിയ മദ്യനയത്തിൽ തീരുമാനിച്ചു എന്നായിരുന്നു നേരത്തെ പുറത്തുവന്ന വാർത്ത.
ഷാപ്പുകളെ ഹോട്ടലുകളിലേത് പോലെ തരംതിരിക്കാനോ സ്റ്റാർ പദവി നൽകാനോ മദ്യനയത്തിൽ തീരുമാനിച്ചിട്ടില്ല. മന്ത്രിയുടെ വാർത്താ സമ്മേളനത്തിന്‌ ശേഷവും പലരും ഈ രീതിയിൽ റിപ്പോർട്ട്‌ ചെയ്യുന്നത് ശ്രദ്ധയിൽപ്പെട്ടതിനെ തുടർന്നാണ്‌ ഇക്കാര്യം അറിയിക്കുന്നത്. തെറ്റായ വിവരം തിരുത്താൻ അഭ്യർത്ഥിക്കുന്നു എന്നും മന്ത്രി കൂട്ടിച്ചേർത്തു.
അതേസമയം കള്ളിനെ പ്രകൃതിജന്യവും പരമ്പരാഗതവുമായ തനത് ലഹരി പാനീയമായി അവതരിപ്പിക്കാനാണ്‌ മദ്യനയത്തിൽ തീരുമാനിച്ചിട്ടുള്ളത്. കള്ള് ഷാപ്പുകളുടെ മുഖഛായ മാറ്റി വിദേശ വിനോദ സഞ്ചാരികൾ ഉൾപ്പടെയുള്ളവർക്ക് കേരളത്തിന്റെ തനത് ഭക്ഷണവും ശുദ്ധമായ കള്ളും ലഭ്യമാകുന്ന സ്ഥാപനങ്ങളാക്കി മാറ്റുകയാണ് ലക്ഷ്യം. ഇതിനായി കേരളാ ടോഡി എന്ന പേരിൽ കേരളത്തിൽ ഉത്പാദിപ്പിക്കുന്ന കള്ള് ബ്രാൻഡ് ചെയ്യാനും മദ്യനയത്തിൽ തീരുമാനിച്ചിട്ടുണ്ട്.
