ഇസ്ലാമിക മാസമായ ദുൽഹജ്ജ് ജൂൺ 30 വ്യാഴാഴ്ച ആരംഭിക്കുമെന്ന് ജ്യോതിശാസ്ത്ര നിഗമനം. എമിറേറ്റ്സ് അസ്ട്രോണമിക്കൽ സൊസൈറ്റിയുടെ കണക്കനുസരിച്ച് വലിയപെരുന്നാൾ ജൂലൈ 9ന് (ദുൽഹജ്ജ്10 )ആവും. ജൂലൈ 8 (ദുൽഹജ്ജ് 9)നാണ് അറഫാ ദിനം. എമിറേറ്റ്സ് അസ്ട്രോണമിക്കൽ സൊസൈറ്റിയുടെ തലവൻ ഇബ്രാഹിം അൽ ജർവനാണ് ഇക്കാര്യം സൂചിപ്പിച്ചത്.
പെരുന്നാൾ പ്രമാണിച്ച് യുഎഇ നിവാസികൾക്ക് നാല് ദിവസത്തെ ഇടവേള ലഭിക്കും. ഇടവേളയിൽ അറഫ ദിനവും ഈദിന്റെ മൂന്ന് ദിവസങ്ങളും ഉൾപ്പെടുന്നു. ജൂലൈ 8 വെള്ളിയാഴ്ച മുതൽ ജൂലൈ 11 തിങ്കളാഴ്ച വരെയായിരിക്കും അവധി ലഭ്യമാവുക.
അതേസമയം നിരവധി എമിറേറ്റികളും പ്രവാസികളും പെരുന്നാൾ അവധിക്കാലം ആഘോഷിക്കാൻ തയ്യാറെടുക്കുന്നതിനാല്‍ ഈ ദിവസങ്ങളില്‍ യാത്രാ തിരക്കേറുമെന്നാണ് സൂചനകൾ. ഷോപ്പിംഗ് മാളുകളിലും പാര്‍ക്കുകളിലും മറ്റും തിരക്കേറും. അതേസമയം കൊവിഡ് വര്‍ദ്ധിച്ചുവരുന്ന പശ്ചാത്തലം കൂടി നിലവിലുണ്ട്.
