2023 ലെ മികച്ച കായിക താരമായി ഇന്ത്യൻ ക്രിക്കറ്റ് താരം വിരാട് കോഹ്‌ലിയെ തെരഞ്ഞെടുത്തു. ലയണൽ മെസിയെയാണ് വിരാട് കോലി മറികടന്നത്. ലോകത്തൊട്ടാകെ 35 മില്യൺ ഫോളവേഴ്‌സുള്ള ഇൻസ്റ്റഗ്രാം അക്കൗണ്ടായ പ്യൂബിറ്റിയാണ് മുൻ ഇന്ത്യൻ ക്യാപ്റ്റനെ കഴിഞ്ഞ വർഷത്തെ മികച്ച കായികതാരമായി തെരഞ്ഞെടുത്തത്. ഓൺലൈൻ പബ്ലിക് വോട്ടിങിലൂടെയായിരുന്നു തെരഞ്ഞെടുപ്പ്. ഫൈനൽ റൗണ്ടിൽ 78 ശതമാനം വോട്ടുകളും കോഹ്‌ലിക്ക് അനുകൂലമായിരുന്നു.
അതേസമയം ഈ വർഷം മെസി ബാലൻഡിഔർ നേട്ടമടക്കം നിരവധി പുരസ്‌കാരങ്ങൾ സ്വന്തമാക്കിയിരുന്നു. പി.എസ്.ജിക്കൊപ്പം ലീഗ് വൺ ട്രോഫി നേടിയതാണ് ഈ വർഷത്തെ പ്രധാന കിരീടം. പിന്നീട് അമേരിക്കൻ ക്ലബ് ഇന്റർമയാമിയിലേക്ക് മെസ്സി ചുടവ് മാറി. അതേസമയം ഏകദിന ലോകകപ്പ് നഷ്ടമായെങ്കിലും കോലിയ്ക്കും കരിയറിൽ വലിയനേട്ടമാണ് 2023ൽ ഉണ്ടായിട്ടുള്ളത്.
ഇതിഹാസ താരം സച്ചിൻ ടെണ്ടുൽക്കറിനെ മറികടന്ന് ഏറ്റവും കൂടുതൽ ഏകദിന സെഞ്ചുറികൾ എന്ന റെക്കോർഡും കോലി സ്വന്തം പേരിലാക്കി. ലോകകപ്പിൽ 11 കളികളിൽ നിന്ന് 765 റൺസാണ് താരം നേടിയത്. കഴിഞ്ഞ വർഷം 2048 റൺസാണ് വിവിധ ഫോർമാറ്റുകളിലായി കോലി നേടിയത്. ദ്യോകോവിച്, പാറ്റ് കമ്മിൻസ്, ക്രിസ്റ്റിയാനോ റൊണാൾഡോ, ലെബ്രോൺ ജെയിംസ്, എർലിങ് ഹാളണ്ട്, മാക്‌സ് വെർസ്റ്റാപ്പെൻ തുടങ്ങി 18 പേരാണ് പ്രാഥമിക ഘട്ട വോട്ടെടുപ്പിലുണ്ടായിരുന്നത്.
