മലയാള സിനിമ മാത്രമല്ല, മറ്റ് സിനിമാ ഇൻഡസ്ട്രികളും ഇരു കയ്യും നീട്ടി സ്വീകരിച്ച ചിത്രമാണ് ഫെബ്രുവരി 22 ന് റിലീസ്‌ ചെയ്ത ‘മഞ്ഞുമ്മൽ ബോയ്സ്’. തിയറ്ററുകളിൽ കയ്യടികളും കരച്ചിലും രോമാഞ്ചവും സൃഷ്‌ടിച്ച ചിത്രത്തിന്റെ വലിയ വിജയം സിനിമാ ലോകം ഒന്നടങ്കം അത്ഭുതത്തോടെയാണ് നോക്കിക്കാണുന്നത്. നിരവധി പ്രമുഖർ സിനിമ കാണുകയും അഭിനന്ദനങ്ങൾ അറിയിക്കുകയും ചെയ്തിരുന്നു.
ഇപ്പോഴിതാ ഒടിടിയിലെത്തിയ ചിത്രത്തെ പ്രശംസിച്ചുകൊണ്ട് എത്തിയിരിക്കുകയാണ് ബോളിവുഡ് താരം വിക്രാന്ത് മാസ്സി. ഈ വര്‍ഷം ഇതുവരെ കണ്ടതിൽ ഏറ്റവും പ്രിയപ്പെട്ട ചിത്രമാണ് ‘മഞ്ഞുമ്മല്‍ ബോയ്സ്’ എന്നാണ് നടൻ പറയുന്നത്. മാത്രമല്ല, എല്ലാവരും ഈ ചിത്രം കാണണമെന്നും സൗഹൃദത്തിന്റെയും ഇച്ഛാശക്തിയുടെയും ഉദാഹരണമാണ് ‘മഞ്ഞുമ്മൽ ബോയ്സ്’ എന്നും നടൻ കൂട്ടിച്ചേർത്തു. ഹോട്ട്സ്റ്റാറാണ് വിക്രാന്തിന്റെ വിഡിയോ ഔദ്യോഗിക സോഷ്യൽ മീഡിയ പേജിലൂടെ പങ്കുവെച്ചത്.
വിക്രാന്തിന്റെ വാക്കുകൾ
ഒരു സർവൈവൽ ത്രില്ലർ സിനിമയേക്കാൾ ത്രില്ലിങ് ആയിട്ടുള്ള കാര്യം എന്താണെന്ന് അറിയാമോ ? ഒരു യഥാർഥ കഥയെ അടിസ്ഥാനമാക്കിയുള്ള ഒരു അതിജീവന ത്രില്ലർ! എല്ലാവരെയും പോലെ ഞാനും ‘മഞ്ഞുമ്മല്‍ ബോയ്സ്’ കണ്ടു. ഈ സിനിമ എന്റെയുള്ളിൽ ഒരിക്കലും പ്രതീക്ഷ കൈ വിടരുതെന്ന എന്ന ചിന്ത വീണ്ടും ജ്വലിപ്പിച്ചിരിക്കുകയാണ്.
സൗഹൃദത്തിന്റെയും ഇച്ഛാശക്തിയുടെയും ഉദാഹരണമാണ് ഈ സിനിമ. കൂടാതെ അതിമനോഹരമായ ദൃശ്യങ്ങളും താരങ്ങളുടെ മനം കവരുന്ന പ്രകടനങ്ങളും ചിത്രത്തെ വൻ വിജയമാക്കി മാറ്റുകയും ചെയ്തു. ഇത് തീർച്ചയായും കണ്ടിരിക്കേണ്ട ചിത്രമാണ്, എന്നെ സംബന്ധിച്ചിടത്തോളം ഈ വർഷം ഇതുവരെ കണ്ട ചിത്രങ്ങളിൽ ഏറ്റവും പ്രിയപ്പെട്ടതാണ് മഞ്ഞുമ്മൽ ബോയ്സ്- വിക്രാന്ത് പറഞ്ഞു.
ജാൻ-എ- മന്നിന് ശേഷം ചിദംബരം സംവിധാനം ചെയ്ത ചിത്രമാണ് ‘മഞ്ഞുമ്മൽ ബോയ്സ്’. ഫെബ്രുവരി 22 ന് തിയറ്ററുകളിലെത്തിയ ചിത്രം ആഗോളതലത്തിൽ 240.59 കോടി നേടി റെക്കോർഡ് സ്വന്തമാക്കിയിരുന്നു. കൊച്ചിയിൽ നിന്ന് ഒരു സംഘം സുഹൃത്തുക്കൾ കൊടൈക്കനാലിൽ വിനോദയാത്ര പോകുന്നതും അവിടെവെച്ച് അവർക്ക് അഭിമുഖീകരിക്കേണ്ടി വരുന്ന സംഭവ വികാസങ്ങളുമാണ് സിനിമയുടെ ഇതിവൃത്തം. ഗുണ കേവിന്‍റെ പശ്ചാത്തലത്തിലാണ് കഥ നടക്കുന്നത്.
ശ്രീനാഥ് ഭാസി, സൗബിൻ ഷാഹിർ, ബാലു വർഗീസ്, ഗണപതി, ലാൽ ജൂനിയർ, അഭിറാം രാധാകൃഷ്ണൻ, ദീപക് പറമ്പോൽ, അരുൺ കുര്യൻ, ഖാലിദ് റഹ്‌മാൻ, വിഷ്ണു രഘു എന്നിവരാണ് ചിത്രത്തിലെ താരങ്ങൾ. പറവ ഫിലിംസിന്റെ ബാനറിൽ സൗബിൻ ഷാഹിർ, ബാബു ഷാഹിർ, ഷോൺ ആന്റണി എന്നിവർ ചേർന്നാണ് ചിത്രം നിർമ്മിച്ചത്. ‘മഞ്ഞുമ്മൽ ബോയ്സ്’ ഡിസ്നി ഹോട്ട്സ്റ്റാറിൽ ഇതിനോടകം തന്നെ സ്ട്രീമിങ് ആരംഭിച്ചിട്ടുണ്ട്.
